കല്ലുവിന്റെ കല്ല്‌ വയ്ക്കാത്ത നുണകള്‍

സര്‍പ്പ സൌന്ദര്യം

2012-01-10T23:41:00.000-08:00

ഇണങ്ങിയും,
പിണങ്ങിയും,
ഇണ ചേര്‍ന്നും,
ഇഴ പിരിഞ്ഞും,
പടം പൊഴിഞ്ഞും,
പുനര്‍ ജന്മത്തിലേക്ക്..
പുതിയ അളയിലേക്ക്!

ഋതു (re posting)

2012-01-10T23:26:00.000-08:00

പണ്ടൊരിക്കല്‍ എഴുതി പോസ്ടിയതാണ്. കേട്ടവര്‍ എന്ത് കരുതും എന്ന് അന്ന് ഭയന്നു. ഇപ്പോള്‍ ഇത് പോലെയും ഇതിനപ്പുറത്തും എഴുതി കഴിഞ്ഞിരിക്കുന്നു. എന്റെ കുഞ്ഞുരുംബിനായി വീണ്ടും പോസ്റ്റുന്നു.

ഋതു
മീന വേനലിലെ ഒരു പ്രഭാതത്തില്‍ ഒരു തെന്നലായ് കടന്നു വന്ന നീ ,
ഇരുള്‍ വീണ എന്റെ മനസ്സില്‍ ചന്ദനത്തിന്റെ സൌരഭ്യം നിറച്ചു .

ആ തെന്നലിനു ശക്തി വച്ചതും അതെന്റെ മനസ്സിന്റെ ജാലകങ്ങള്‍ തുറന്നിട്ടതും ഞാന്‍ കാര്യമായെടുത്തില്ല .

ഒന്ന് , രണ്ട് , മൂന്ന് എല്ലാം ഒരു തമാശയായിരുന്നു .

വേനല്‍ മഴ ചാറി ത്തുടങ്ങിയപ്പോള്‍ നിന്റെ മണം നനഞ്ഞ മണ്ണിന്റെയായി മാറി . നനഞ്ഞ മണ്ണില്‍ നിന്നും പൊങ്ങി വന്ന ഈയാം പാറ്റകള്‍ മരിച്ചു വീണത്‌ കണ്ടിട്ടും കണ്ടില്ലെന്നു നടിച്ചു .

ഇടിയും മിന്നലുമായി വേനല്‍ മഴ കനത്തപ്പോള്‍ , അതെന്നെ നനയ്ക്കാതിരിക്കാന്‍ നീയെനിക്ക് കുട ചൂടിച്ചു .
പിന്നീട് തെന്നിപ്പറക്കുന്ന കരിയിലയായി നീ മഴയത്ത് മറഞ്ഞു .

ഇടവപ്പാതി ഇടവഴികളില്‍ നിര്‍്ച്ചാലുകള്‍് സൃഷ്ടിച്ചപ്പോള്‍, ഞാന്‍ എന്റെ മനസ്സിലും പ്രണയത്തിന്റെ നീരുറവ കണ്ടു . മഴയില്‍ കുതിര്‍ന്നു മുഖത്ത് ചുടു കണ്ണീര്‍ വാര്‍ന്നപ്പോള്‍ , ചേമ്പിലയില്‍ വീണ മഞ്ഞു തുള്ളി പോലെ നീയത് കയ്യിലെടുത്തു . കാലം ചെയ്ത പേമാരിയില്‍ തളര്‍ന്നു വീഴാതെ , ഞാന്‍ നിന്റെ ചാരെ ചേര്‍ന്നിരുന്നു .

വര്‍ഷം പെയ്തു തോര്‍ന്നപ്പോള്‍ സ്നേഹം ഒരു പുഴയായൊഴുകി . ആ പുഴയ്ക്കു പെരിയാറിന്റെ ഛായയായിരുന്നു . പുറമെ ശാന്തമായി തോന്നിയെന്കിലും അതിന്റെ ആഴങ്ങളില്‍ നീരൊഴുക്ക് ശക്തമായിരുന്നു . പെരിയാര്‍ തീരത്തിനും ഉണ്ട് ഒരധ്യായം പറയാന്‍ . ഞാന്‍ പരമേശ്വരനോട് പറഞ്ഞതെന്തെന്നോ ? പറഞ്ഞാല്‍ അതിന്റെ ശക്തി കുറയുമോ , നീ അറിയാതിരിക്കട്ടെ .

പാലപ്പൂവിന്റെ ഗന്ധവുമായി വൃശ്ചിക കാറ്റു വന്നെത്തി , വെള്ളമില്ലാതെ ആഹാരമില്ലാതെ ഒരു പുക പോലുമില്ലാതെ കണ്ണുകള്‍ മാത്രം സംസാരിച്ച ദിനങ്ങള്‍ .

ഒടുവില്‍ എല്ലാം കൊഴിഞ്ഞു വീഴുന്നെന്നു ഓര്‍മിപ്പിച്ചു കൊണ്ട് ശിശിരം വന്നു . പിന്നെ ഒന്നും പുതുതായി സംഭവിച്ചില്ല , ഓരോ ഇതളുകളായി ഓര്‍മ്മകള്‍ പൊഴിഞ്ഞു വീണു . താഴെ വീണ കരിയിലകളില്‍ വീണു ഞാന്‍ ചിരിച്ചു , ചിരിച്ചു കൊണ്ടു കരഞ്ഞു. മുകളില്‍ തെളിഞ്ഞ നീലാകാശം . ഇലകള്‍ വീണു കൊണ്ടേ ഇരുന്നു . ആ ഇലക്കൂമ്പാരത്തിനുള്ളില്‍് അവര്‍ ജീര്‍്ണ്ണിക്കുമെന്ന് പലരും കരുതി .

പക്ഷെ മണ്ണിനടിയിലേയ്ക്ക് വേരുകളിറങ്ങിയത് ആരും കണ്ടില്ല , എന്റെയോ നിന്റെയോ എന്ന് തിരിച്ചറിയാന്‍ പറ്റാത്ത വിധേന വേരുകള്‍ മണ്ണിന്റെ മാറിലേയ്ക്ക് പടര്‍ന്നു .

ഒരിക്കല്‍ ഇഷ്ടത്തിന്റെ വലുപ്പം ആരാഞ്ഞതിന് , ഒരു കുഞ്ഞുറുമ്പിന്റെ അത്രേം എന്ന് മറുപടി വന്നപ്പോള്‍ നീ പറഞ്ഞു ' അവന്റെ എല്ലാ കുറവുകളിലും നീ പൂര്‍ണ്ണത കാണുന്നെങ്കില്‍ , ശരി , ഞാനാ കുഞ്ഞുറുമ്പാണ് !'

അതാ ഒരു കുഞ്ഞുറുമ്പ് ഒരിലയുമായി പോകുന്നു ....

രേതസ്സ്

2011-12-05T22:41:00.000-08:00

എന്‍റെ ഗര്‍ഭപാത്രത്തില്‍ അവന്‍റെ രേതസ്സ് കുതിച്ചു പായുന്നത് ഞാന്‍ സ്വപ്നം കണ്ടു..

സിരകളില്‍ രതി നിറഞ്ഞപ്പോള്‍ ഞാന്‍ അവന്‍റെ ചെവിയില്‍ മെല്ലെ പറഞ്ഞു...
"എനിക്കു നിന്‍റെ കുഞ്ഞിനെ പ്രസവിക്കണം..."

പെട്ടെന്ന് അവന്‍ ചാടി എണീറ്റിരുന്നു. വിറങ്ങല്ലിച്ച കുറച്ചു നിമിഷങ്ങള്‍ക്ക് ശേഷം പാന്റിന്‍റെ പോക്കെറ്റില്‍ നിന്നും സിഗരട്റ്റ് തപ്പിയെടുത്ത് പുക കൊടുത്തു.

ഒരു നിമിഷം കൊണ്ടു അഗാധ ഗര്‍ത്തത്തില്‍ പതിഞ്ഞ പോലെ. പറഞ്ഞത് തെറ്റായി പോയോ... എന്ത് തെറ്റ്? വര്‍ഷങ്ങള്‍ക്കു മുന്പ് നമ്മള്‍ ഒരുമിച്ചു അവള്‍ക്കും അവനും പേര്‍ കണ്ടു പിടിച്ചതല്ലേ..

അഴിഞ്ഞു കിടന്ന സാരി മാറില്‍ വാരിപ്പിടിച്ചു വിയര്‍പ്പു പൊടിഞ്ഞ അവന്റെ പുറത്തേക്കു ഞാന്‍ തല ചായ്ച്ചു...
"എന്തേ.. ഇഷ്ടായില്ലേ.. ഞാന്‍ പറഞ്ഞതാണോ അതോ എന്നെ തന്നെയാണോ ഇപ്പൊ ഇഷ്ടല്ലാതായത്"

"നിനക്ക് നഷ്ടപ്പെടാന്‍ ഒരു വലിയ ലോകം കൂടെയുണ്ട്...", അവന്‍ പിറുപിറുത്തു.

പിന്നീടവന്‍ ധിറുതിയില്‍ പാന്റും ഷര്‍ട്ടും എടുത്തിട്ട് ...തിരിഞ്ഞു നോക്കാതെ... ഇരുട്ടത്തേക്കിറങ്ങി നടന്നു...

സാലഭഞ്ജിക

2011-09-04T02:50:00.000-07:00

ഒരിക്കലൊരുവനൊരു സാലഭഞ്ജികയെ കളഞ്ഞു കിട്ടി ,
അതയാള്‍ വീട്ടില്‍ കൊണ്ടു പോയി സൂക്ഷിച്ചു വച്ചു .

കണ്ടു കണ്ടിരിക്കെ അയാള്‍ക്കതിനോട് ഇഷ്ടം തോന്നി ,
തിരിച്ചൊന്നും പറയാത്തതിനാല്‍ മൌനം സമ്മതമെന്നും-
അതല്ല മറിച്ചതവളാണെന്നും അയാള്‍ സങ്കല്‍പ്പിച്ചു.

തന്‍റെ വിചാരങ്ങളും സ്വപ്നങ്ങളും അയാള്‍ അവളുമായി പങ്കു വച്ചു
അവളയാളെ തുറുപ്പിച്ചു നോക്കിയതല്ലാതെ ഒന്നും മിണ്ടിയില്ല.

പിന്നീടയാള്‍ തന്‍റെ വിഷമങ്ങളും പരാതികളും അവളെ കരഞ്ഞു കേള്‍പ്പിച്ചു..
ഇത്തിരി പോലും അനക്കം വരാത്ത ആ പ്രതിമയില്‍ അയാള്‍ ആഞ്ഞു തുപ്പി.

എന്നിട്ടും മിണ്ടാതെയായപ്പോള്‍ അവളെ അയാള്‍ തല്ലി നോക്കി..
അവളുടെ മൌനം അയാളെ ഭ്രാന്തനാക്കി..

തന്നെ മനസ്സിലാക്കാത്ത ലോകത്തോടുള്ള രോഷം
അവളെ തല്ലിയാല്‍ തീരുമെന്ന് അയാള്‍ ചിന്തിച്ചു.

തല്ലി തല്ലി മടുത്ത് ആ കല്ലിനെ തച്ചുടക്കാനൊരുങ്ങിയപ്പോള്‍
അയാള്‍ കേട്ടു, ‘അരുത് ’ , ആ കരിങ്കല്‍ കണ്ണുകള്‍ ഒന്ന് ചിമ്മിയോ ?

അയാള്‍ സന്തോഷത്തോടെ തുള്ളിച്ചാടി , തന്‍റെ പ്രണയത്തിനു ജീവന്‍ വന്നിരിക്കുന്നു ,

അയാള്‍ അവളെ വീണ്ടും വീണ്ടും ഭോഗിച്ചു … മതി വരുവോളം… ഹാ..

പ്രണയത്തിന്‍റെ ഇടനാഴിയിലൂടെ....

2011-08-15T10:13:00.000-07:00

പ്രണയത്തിന്‍റെ ഇടനാഴിലേക്കുള്ള നിന്‍റെ ക്ഷണം തടുക്കാനാകാത്ത പ്രലോഭനമാണ്‌... കാരണം,

എനിക്കറിയാം...

ആ ഇടനാഴി സ്വച്ഛസുന്ദരമാണ്.. ശീതളമാണ്.. സര്‍വ്വോപരി സ്വര്‍ഗ്ഗതുല്യമാണ്!
ഒരുമിച്ചു കൈ കോര്‍ത്ത്‌ നടക്കാന്‍ നീ കൂടെ ഉള്ളപ്പോള്‍പിന്നെ ഇതില്‍ പരം സുഖം മറ്റൊന്നിനില്ല, നിശ്ചയം.

ഇടനാഴിയിലിടയിലായി ജാലകങ്ങലുണ്ട്.. അതിലൂടെ നമുക്ക് ബാഹ്യ ലോകത്തെ കാണാം.. പൊന്‍ വെയിലും പൂക്കളും പൂമ്പാറ്റയും എല്ലാം തന്നെ നമുക്കായി സൃഷിച്ചതാണെന്ന് തോന്നിയേക്കാം. ലോകം നമ്മെ കാണാതെ നമുക്ക് ഇടനാഴിയിലെ നിഴലുകളില്‍ മറഞ്ഞിരിക്കാം.

പിന്നെയും നടന്നു അകത്തളത്തിലെ നടുമുറ്റത്തിറങ്ങി ഒരുമിച്ചു നമുക്കീ പുതുമഴ നനയാം...

അങ്ങിനെ നനഞ്ഞു കുതിര്‍ന്ന് തണുത്ത്‌ വിറച്ച എന്നെയും കൂട്ടി നീ പതിയെ പടികള്‍ കയറും.. ഈറനായ ഉടുതുണിക്കൊപ്പം നമ്മളണിഞ്ഞ മുഖം മൂടികളും അഴിഞ്ഞു വീഴുകയായി.. പിന്നെ എല്ലാ ചിന്തകളും വിചാരങ്ങളും വിഷമതകളും വിലങ്ങുകളും വിലക്കുകളും ഭേദിച്ച് ഞാനും നീയും മാത്രമാകുന്ന നിമിഷങ്ങള്‍... നിന്‍റെ നെഞ്ചിലെ ചൂടിനായി ഞാന്‍ നിന്നിലേക്ക്‌ പറ്റിച്ചേരും.. എനിക്കു ചൂട് പകര്‍ന്ന് എന്നിലലിയാന്‍ നീയും വെമ്പും.. എന്‍റെയും നിന്‍റെയും വിയര്‍പ്പൊന്നിചൊഴുകി നീയും ഞാനും ഒരു പോലെ ശ്വസിച്ച് ...പിന്നെ ...ഭാരമെല്ലാം മറന്ന് ഒരപ്പൂപ്പന്‍ താടി കണക്കെ തെന്നിപ്പറന്ന് ഒടുവില്‍ നമ്മള്‍ രണ്ടും ഒരാത്മാവിന്‍റെ ഭാഗമാണെന്നറിയുന്ന നിമിഷം...

(നിന്‍റെ രേതസ്സ് എന്‍റെ ഗര്‍ഭപാത്രത്തില്‍ മറ്റൊരു ജീവനെ തിരയില്ലേ ? അതല്ല, അതിനാ ഇടനാഴി നിഷേധിച്ചാല്‍ അത് പിന്നെ തല തല്ലി ചാവില്ലേ ? )

കയങ്ങളില്‍ മുങ്ങി പൊങ്ങി, നീന്തിക്കിതച്, കരക്കടുക്കുമ്പോള്‍.. പിടഞ്ഞെണീറ്റ് കയ്യില്‍ക്കിട്ടിയ വസ്ത്രങ്ങള്‍ ചുറ്റി നീ പറയും...

"പിരിയണം, ഈ ഇടനാഴി ഇവിടെ അവസാനിക്കുന്നു, ഇനി നിന്‍റെയും എന്‍റെയും വഴികള്‍ രണ്ടാണ്.."

എന്‍റെ നിറ കണ്ണുകളില്‍ നിന്‍റെ രൂപം അലിഞ്ഞില്ലാതാകുമ്പോള്‍ ചുട്ടു പഴുത്ത വെള്ളാരം കല്ലുകളില്‍ എന്‍റെ മൃദുമേനി കരിഞ്ഞുണങ്ങും. പിന്നെയാ അല്‍പ്പപ്രാണന് കൂട്ടിരിക്കാന്‍ ശവംതീനി കഴുകന്മാര്‍ വരും. പ്രാണനവശേഷിപ്പുണ്ടോ എന്നറിയാന്‍ ഇടയ്ക്കിടെ അവ എന്നെ കൊത്തി വലിക്കും.

പിന്നെയെപ്പോഴോ വീഴുന്ന അല്‍പ്പ ബോധത്തില്‍ ഞാന്‍ മനസ്സിലാക്കും ഞാന്‍ കിടക്കുന്നത് വലിയ ഉരുണ്ട വെള്ളാരം കല്ലുകളിലല്ല, മറിച്ച് അവിടെ ഒടുങ്ങിയ കാമിനിമാരുടെ തലയോട്ടികളിലായിരുന്നെന്ന്!

ഇല്ല, എനിക്കു ജീവിച്ചു കൊത്തി തീര്‍ന്നിട്ടില്ല... ഈ ക്ഷണം സത്യസന്ധമായിരിക്കാം, എങ്കിലും ക്ഷണികമത്രേ...

പ്രണയത്തിന്‍റെ ഇരുണ്ട ഇടനാഴിയിലേക്ക്‌ ഞാനില്ല. തീര്‍ച്ച.

കൊക്കും പെണ്ണും.....

2011-08-06T04:11:00.000-07:00

ഒരിക്കല്‍ ഒരു വേട്ടക്കാരനുണ്ടായിരുന്നു.. ഒരു ദിവസം അയാള്‍ ഒരു കൊക്കിനെ പിടിക്കാമെന്ന് കരുതി. അയാള്‍ ഒരമ്പതോളം കൊക്കുകളെ വെടി വച്ച് വീഴ്ത്തി.. അതെല്ലാം പെണ്ണായിരുന്നു... അയാള്‍ പറഞ്ഞു... "ലോകത്ത് കൊക്കെന്നൊരു പക്ഷിയുണ്ടേല്‍ അതെല്ലാം പെണ്ണാണ്.

പ്രിയപ്പെട്ട മാഷ്ക്ക്..

2011-07-25T01:53:00.000-07:00

പ്രിയപ്പെട്ട മാഷ്ക്ക് ,

ആറു വര്‍ഷത്തിനിടെ ഈ നഗരം ഒട്ടേറെ മാറിയിരിക്കുന്നു, എനിക്കും വന്നല്ലോ മാറ്റങ്ങള്‍... എനിക്കു പ്രായം ഏറുകയും നഗരത്തിനു പ്രായം കുറയുകയും ചെയ്ത പോലെ...

ആദ്യം കണ്ടത് അവളെയാണ്... മാസങ്ങളായി കണ്ടിട്ട്, അവളോട്‌ പറയാന്‍ ഒരു കൊട്ട വിശേഷങ്ങളുണ്ടായിരുന്നു. അവള്‍ എന്‍റെ അടുത്ത് നിന്നും താമസം മാറ്റിയത് നന്നായി എന്നൊരിക്കല്‍ പറഞ്ഞല്ലോ? ഞാനൊരു ലെസ്ബിയന്‍ അല്ല എന്ന് അന്ന് ഞാന്‍ വാദിച്ചു. കല്യാണിയുടെ കാമനകള്‍ക്ക്‌ ലിംഗഭേദമില്ല എന്ന് മാഷും.

ആരാധനയായിരുന്നു എനിക്കവളോട്.. ഒരിക്കല്‍ എന്നെ അസഭ്യം പറഞ്ഞ ആ .....നെ അവള്‍ തെറിയഭിഷേകം ചെയ്തപ്പോള്‍ ഞാന്‍ അവളുടെ മറ പറ്റി നിന്നു. അവള്‍ വളര്‍ന്നു വലുതായി ഒരു വന്‍ പാലമരമായി. അവളുടെ തണല്‍ ചേര്‍ന്ന് ഞാന്‍ ഒരു പാവം യക്ഷിയും. ഒരിക്കല്‍ എന്‍റെ സ്കെച്ച് പുസ്തകത്തിലെ വരകളിലൂടെ വിരലോടിച്ചു കൊണ്ടു അവള്‍ പറഞ്ഞു... "ഈ ലോകത്തെ ഏറ്റവും സുന്ദരമായ സൃഷ്ടി പെണ്ണാണ്‌, അവളില്ലായിരുന്നേല്‍ ഈ ലോകത്ത് സൌന്ദര്യമേ ഇല്ലാതിയിരുന്നേനെ!"

സത്യമാണ്, അവളൊരു സുന്ദരിയായിരുന്നു, ആരാധന അവളുടെ വടിവൊത്ത ശരീരത്തിനോടും ഉണ്ടായിരുന്നു, ഒന്ന് വരയ്ക്കാന്‍ കാണിച്ചു തരുമോ എന്ന് ചോദിച്ചാലോ എന്ന് ഞാന്‍ പലതവണ കരുതിയതാണ്, എല്ലാം ലൈഗീകരിച്ചു കാണുന്ന ലോകത്ത് തെറ്റിദ്ധരി ക്കപ്പെട്ടാലോ എന്ന സംശയം എന്‍റെ ആവശ്യത്തെ പിടിച്ചു നിര്‍ത്തി.

ഞാന്‍ രണ്ടു ദിവസം അവള്‍ താമസിക്കുന്ന ഹോസ്റ്റലില്‍ നിന്നു, പിന്നീട് സങ്കീര്‍ണ്ണമായ മനസ്സോടെ ഞാന്‍ മടങ്ങി. ഓടി പോരുകയായിരുന്നു എന്ന് വേണേലും പറയാം.

ആദ്യ ദിവസം എനിക്ക് പനിയായിരുന്നു , അന്ന് അവളുടെ മടിയില്‍ തലചായ്ച്ചുറങ്ങി.... വര്‍ഷങ്ങളായി ഉറക്കത്തിനിടയിലെ സ്പര്‍ശനം ഒരു പേടി സ്വപ്നമാണ്... ഒരിക്കല്‍ 'എന്നെ ഒന്നും ചെയ്യല്ലേ' എന്ന് പറഞ്ഞു ഞാന്‍ ഉറക്കത്തില്‍ കരഞ്ഞുവെന്നു ഉണ്ണീടെ അച്ഛന്‍ പറഞ്ഞു, അതില്‍ പിന്നെ അദ്ദേഹം ഉറക്കത്തില്‍ എന്നെ ശല്യം ചെയ്യില്ല...

അന്ന് മുടികളില്‍ തലോടിയ അവളുടെ കൈകളില്‍ ഞാന്‍ സ്നേഹം തൊട്ടറിഞ്ഞു. ആ വിരലുകള്‍ വസ്ത്രങ്ങളിക്കിടയില്‍ പരതിയില്ല... ഞാനന്ന് സുഖമായുറങ്ങി...
നെറ്റിയില്‍ നനച്ചിട്ട പഴന്തുണിക്ക് കണ്ണീരിന്‍റെ രസമായിരുന്നു.

പിറ്റേന്നു അവള്‍ മനസ്സ് തുറന്നു, ഒരിക്കല്‍ പ്രണയിചിരുന്നെന്നും അത് വീട്ടുകാര്‍ നടത്തി കൊടുക്കാതെ മറ്റൊരു വിവാഹത്തിന് നിര്‍ബന്ധിക്കുകയായിരുന്നെന്നും എനിക്കു മുന്പേ അറിയാമായിരുന്നു. അയാളെക്കുറിച്ച് സംസാരിക്കുമ്പോള്‍ അവളുടെ കണ്ണുകളില്‍ തിളക്കം ഞാന്‍ ശ്രദ്ധിച്ചിരുന്നു. പക്ഷെ എന്‍റെ അടുത്ത് നിന്നും അവള്‍ പോയത് അയാളുടെ അടുത്തേക്കാണ്‌. ഇന്നിതാ പറയുന്നു അയാളില്ലാതെ അവള്‍ക്കു ജീവിക്കാന്‍ പ്രയാസമാണെന്ന്.

അമ്മയുടെ മുഖം പോലും അവള്‍ കണ്ടിട്ടില്ല, അമ്മയെ ചവിട്ടി കൊന്ന അച്ഛന്‍ ... അനാഥാലയത്തില്‍ വളര്‍ന്ന ചേച്ചിമാര്‍, പൊടിക്കുഞായിരുന്നത് കൊണ്ട് അവളെ സ്വന്തം അമ്മായി ഏറ്റെടുത്തു വളര്‍ത്തി, അവള്‍ പറയുന്നു ഒരു കന്നിനെ പോലെയായിരുന്നു അവരവളെ വളര്‍ത്തിയതെന്ന്. പ്രീ ഡിഗ്രീ വരെ പഠിച്ചു, പിന്നീട് പഠിക്കാന്‍ ആഗ്രഹിച്ചിട്ടും അവര്‍ പഠിപ്പിച്ചില്ല . അവളെ മോഹിച്ചവനെ അവര്‍ തല്ലിച്ചതച്ചു. നില വിട്ടു പോയ മനസ്സിനെ അവര്‍ വീട്ടു തടങ്കലില്‍ ഇട്ടു. പിന്നെ പത്തൊന്‍പതാം വയസ്സില്‍ വിവാഹം...

ആദ്യ രാത്രിയിലെ പീടനത്തിന്‍റെ കരിനീലിച്ച പാടുകളും അയാള്‍ കടിച്ചു പറിച്ച അവളുടെ ചുണ്ടും എനിക്കോര്‍മയുണ്ട്.... മദ്യപാനിയും ധൂര്‍ത്തനുമായ അവളുടെ ഭര്‍ത്താവ് വിദേശത്താണിപ്പോള്‍.. അവിടെയും അങ്ങിനെ തന്നെയത്രെ... ജീവിതത്തില്‍ ആദ്യമായും അവസാനമായും സ്നേഹിച്ചത് അവന്‍ മാത്രമത്രേ... അവനും വിവാഹിതന്‍.... ഒരു കുഞ്ഞിന്‍റെ അച്ഛന്‍...

പക്ഷെ സ്നേഹം മാംസനിബന്ധമാണെന്നെ എനിക്കിന്നെ വരെ തോന്നിയിട്ടുള്ളൂ.... ഇത്രയും സ്നേഹമുണ്ടായിരുന്നേല്‍ അവനെന്തേ അവളെ വിവാഹം ചെയ്തില്ലാ....
"അന്ന് ഞങ്ങള്‍ വളരെ ചെറുപ്പമായിരുന്നില്ലേ ? ഒരാളെയേ ഞാന്‍ സ്നേഹിചിട്ടുള്ളൂ, എന്നെ സ്നേഹിച്ചത് ഒരേ ഒരാളും. ഒരു ദിവസം അഞ്ചാറ് തവണ വേഴ്ച ചെയ്യപ്പെട്ട് പഴുത്തുണങ്ങാത്ത മുറിവുമായി ദിവസങ്ങള്‍ പിന്നിടുമ്പോള്‍ ആ മനുഷ്യനോടു സ്നേഹം തോന്നില്ല കല്യാണി, അറപ്പും വെറുപ്പും മാത്രം... ഹൃദയത്തിലല്ലേ സ്നേഹം ഇരിക്കുന്നത് കാലിനിടക്കാണോ ? അറിയാം എങ്ങനെ ന്യായീകരിച്ചാലും ഇതൊരു ചതിയാണ്, പക്ഷെ ഇന്ന് എന്‍റെ ജീവിതത്തില്‍ ആകെ ഒരാശ്വാസം അവനെ ഉള്ളു.... ജീവിതത്തില്‍ ഒരിക്കലും സ്നേഹം എന്താന്ന് ഞാന്‍ അറിഞ്ഞിട്ടില്ല, എനിക്കിത്തിരി സ്നേഹം വേണം....... ആ കൈകള്‍ക്കുള്ളില്‍ നെഞ്ചോട്‌ ചേര്‍ന്ന് നില്‍ക്കുമ്പോള്‍ എല്ലാ വേദനയും ഞാന്‍ മറക്കും...."

(ഞാന്‍ സ്നേഹിക്കുന്നില്ലേ നിന്നെ ? അത് മാത്രം മതിയാവില്ല... സ്നേഹം മാംസ നിബന്ധമാണല്ലോ!!)

"അയാള്‍ നിന്നെ ഉപയോഗിക്കുകയായിരികും".. എനിക്കു സങ്കടമോ ദേഷ്യമോ പരിഭവമോ പരിഭ്രാന്തിയോ എന്താണെന്നു നിശ്ചയമില്ലാത്ത അവസ്ഥ!

അതിനവള്‍ ഉത്തരം തന്നില്ല....
അവള്‍ ഒരു നെടുവീര്‍പ്പോടെ ദൂരേയ്ക്ക് നോക്കിയിരുന്നു...

ആ ഹോസ്റ്റലില്‍ മറ്റൊരു സ്ത്രീ (എന്‍റെ പ്രായം കാണും ) ഒരു കോണില്‍ ഇരുട്ടത്തിരിക്കുന്നത് ഞാന്‍ കണ്ടു... അവള്‍ അവരുടെ കഥയും പറഞ്ഞു, വിവാഹിതയായിരുന്നു, കുഞ്ഞുമുണ്ട് , കാമുകന്‍റെ കൂടെ പിടിക്കപ്പെട്ടപ്പോള്‍ മരിക്കാനിറങ്ങിയെന്നും കാമുകന്‍ രക്ഷിച്ചു അവിടെ കൊണ്ടു താമസിപ്പിചിരിക്കയാണെന്നും രണ്ടു ദിവസം മുന്നേ ആദ്യ ഭര്‍ത്താവിന്‍റെ രണ്ടാം വിവാഹമായിരുന്നെന്നും അവള്‍ പറഞ്ഞു.

അങ്ങിനെ അവിഹിത ബന്ധങ്ങളുടെ കഥകള്‍ കേട്ട് ചെടിച്ചു മറ്റൊരു ഹോസ്റ്റല്‍ ഞാന്‍ കണ്ടെത്തി... അവള്‍ നല്ല സ്ത്രീയാണെന്ന് ഞാന്‍ ഉണ്ണീടെ അച്ഛനോട് വാദിച്ചിട്ടുണ്ട്... നല്ലതും കെട്ടതെന്നും വിലയിരുത്താന്‍ ഞാന്‍ ആളല്ല... എന്നാലും.. എന്തോ... എവിടെയോ ഒരനിഷ്ടം.

ഇതെല്ലാം പറയുന്നതിനിടയില്‍ അവളുടെ മകള്‍ പല തവണ ഒരു ബുക്കും പേപ്പറുമായി അവളുടെ അടുത്ത് വന്നു... അവള്‍ കുഞ്ഞിനെ ഗൌനിച്ചതെ ഇല്ല, ഒടുക്കം അത് മേടിച്ചു ഞാന്‍ പടം വരച്ചു കൊടുത്തു... പിഴകളെണ്ണി അവള്‍... അവളുടെ അരികില്‍ വളര്‍ന്നു വരുന്ന മറ്റൊരു ജീവന്‍... (സ്നേഹം എന്നത് അവള്‍ അറിയുന്നുണ്ടോ എന്തോ?) അവളിതെല്ലാം കേള്‍ക്കുകയും കാണുകയും ചെയ്യുന്നില്ലേ ? അവള്‍ക്കു ഇതെല്ലാം മനസ്സിലാകുന്നുണ്ടാവില്ലേ ? അവള്‍ക്കു അവളുടെ അമ്മ അല്ലാതെ വേറെ ആരും ഇല്ല... അവളുടെ ബാല്യം അവളുടെ അമ്മയുടെ നിലക്കാത്ത കണ്ണീരില്‍ ഒഴുകി പോകില്ലേ... സ്നേഹം എന്നത് കീറിയ ഉടുപ്പുകളും മൂന്നു നേരത്തെ ബിസ്കറ്റും ആണോ ? മെലിഞ്ഞു കോലം കെട്ട ഒരു കുഞ്ഞ്... ജനിപ്പിച്ച് പോയതില്‍ അവള്‍ക്കു മകളോട് അമര്‍ഷം കാണുമോ ? അതൊരു കുഞ്ഞിനെ പോലെ ചിരിക്കുകയോ കൊഞ്ചുകയോ ചെയ്യുന്നില്ല... മാഷെ... മനസ്സിലൊരു നീറ്റലായിരുന്നു.... യാത്ര പറഞ്ഞിറങ്ങിയപ്പോള്‍ നിറുകയില്‍ ഞാന്‍ കൊടുത്ത മുത്തത്തില്‍ നിന്നും ആ മോള് കുതറിയോടി....

പണ്ട് ഒത്തിരി സങ്കടം വരുമ്പോള്‍ ആ ഇരുട്ടുള്ള മുറി ഓര്‍മ വരുമായിരുന്നു, ഇപ്പൊ തോന്നും രണ്ടു കരങ്ങള്‍ക്കുള്ളില്‍ നെഞ്ചോട്‌ ചേര്‍ന്ന് നില്‍ക്കുന്നതായി... അത് അവളാണോ ഞാനാണോ... നിശ്ചയല്ല്യ....

സസ്നേഹം
കല്യാണി

കീഴ്ശ്വാസം

2011-07-19T20:21:00.000-07:00

*പണ്ടാരോ പറഞ്ഞു കേട്ടതാണ്... "രാവിലെ ബസിന്‍റെ സ്ത്രീ വശത്തിനു കീഴ്ശ്വാസത്തിന്‍റെ ഗന്ധമാണെന്ന്!".

ഇന്ന്, തൃശൂര്‍ - എറണാകുളം പാസഞ്ചറിന്‍റെ ലേഡീസ് കമ്പാര്‍ട്ട് മെന്ടില്‍ ഇരിക്കുമ്പോള്‍ ഞാനതോര്‍ത്തു പോയി.

രാവിലത്തെ വെപ്രാളത്തിന് മറന്നുപോയതും, മനപ്പൂര്‍വ്വം മറന്നതും , മാറ്റിവച്ചതുമായ എത്രയോ കാര്യങ്ങള്‍.. അങ്ങിനെ കുമിഞ്ഞു കൂടി അഴുകിയതെല്ലാം പേറി എത്രയോ സ്ത്രീ ജന്മങ്ങള്‍ - ഒരുവള്‍ എന്‍റെ അടുത്തിരുന്നു ഈറന്‍ മുടി കൊതുന്നു.. അപ്പുറത്ത് മറ്റൊരുവള്‍ സാരി ഊരി ചുറ്റുന്നു... ഒരു കോണില്‍ ദേവീ സ്തോത്രം ചൊല്ലി വേറൊരുവള്‍‍....

അങ്ങിനെ ഒന്ന് ശ്വാസം വിടാന്‍ കിട്ടണ നേരമാണ് ട്രെയിന്‍ യാത്ര പലര്‍ക്കും....

*പണ്ട് അമ്മയുടെ സഹപ്രവര്‍ത്തകന്‍ പറഞ്ഞതായി അമ്മ പറഞ്ഞു കേട്ടതാണ്...

യക്ഷി

2011-05-22T10:46:00.000-07:00

കല്യാണിയുടെ കണ്ണിണക്കറിയാത്ത മായജാലങ്ങളില്ല.
കണ്ണെറിയാന്‍,
കണ്‍മുനയില്‍ മനം കോര്‍ക്കാന്‍ ,
ഒറ്റ നോട്ടത്തില്‍ ഒരുവനെ ദഹിപ്പിക്കാന്‍ ,
സ്നേഹിക്കാന്‍ , പ്രണയിക്കാന്‍ ,
പിണങ്ങാന്‍ , ഇണങ്ങാന്‍ ...

"നോട്ടം കണ്ടില്ലേ , യക്ഷിയെപ്പോലെ "
കല്യാണിയുടെ കണ്ണുകളിലെ ഭാവം മാറി , ഇടഞ്ഞെന്നുറപ്പ്! കലഹിച്ചു കൊണ്ട് അവനെ അവള്‍ തറപ്പിച്ചു നോക്കി.

"എപ്പോഴെങ്കിലും ചിന്തിച്ചിട്ടുണ്ടോ എന്തെ ഈ സ്ത്രീകള്‍ മാത്രം യക്ഷികളാകുന്നതെന്ന് ? പുരുഷനങ്ങിനെയൊരു പരിവേഷമില്ല , ഉം ?"

ഇല്ലെന്നു അവളുടെ കണ്ണുകള്‍ പറഞ്ഞതറിഞ്ഞാവണം അവന്‍ തുടര്‍ന്നു "ഒരു പുരുഷായുസ്സില്‍ തീര്‍ക്കാനാകാത്ത ആഗ്രഹങ്ങള്‍ പുരുഷന് ഇല്ലെന്നു വേണേല്‍ പറയാം ; എങ്കില്‍ സ്ത്രീകളോ , കുരുതി കൊടുത്ത ഏറെ സ്വപ്നങ്ങളുടെ നെരിപ്പോടും! അങ്ങനെ , തീരാത്ത മോഹങ്ങളുള്ള സ്ത്രീ മനസ്സുകളാണ് യക്ഷികളായി പരിണമിക്കുന്നത് ."

"നീ എന്തിനെന്നെ യക്ഷിയെന്നു വിളിച്ചു ?"
അവളുടെ കണ്ണുകള്‍ ആര്‍ദ്രമായി.
മനസ്സൊരു നെരിപ്പോടാണെന്നും ഗതികിട്ടാതലയുന്നതാണ് തന്‍റെയാത്മാവെന്നും അതിനു ധ്വനിയില്ലേ ? ഉള്ളിലെവിടെയോ കൊളുത്തി വലിച്ചു.

കണ്ണെടുക്കാതെ ഒരു കുസൃതിച്ചിരിയോടെ അവന്‍ പറഞ്ഞു ,
"ചുടലയക്ഷി, വടയക്ഷി , രക്തരക്ഷസ്സ് അങ്ങിനെ പല ജാതി യക്ഷികളുണ്ട് , നീ(എന്‍റെ ) സുന്ദരിയക്ഷിയല്ലേ ?"

കല്യാണി ഇത്തിരി ചമ്മലോടെ കിലുങ്ങിച്ചിരിച്ചു.

പവര്‍ കട്ട്

2011-05-11T20:58:00.000-07:00

ചില നേരത്ത് തോന്നും ഇടയ്ക്കിടെ പവര്‍ കട്ട് നല്ലതാണെന്ന് ; കുടുംബത്തെ പുരുഷന്മാര്‍ സംസാരിക്കുന്നതപ്പോഴാണ്!

ഹൃദയമില്ലാത്തവള്‍!

2010-09-10T01:30:00.000-07:00

ചോരയിറ്റു വീഴുമാ ചങ്കെടുത്തു
ചെമ്പരത്തിപ്പൂവിതിനെന്തു -
മണമെന്നു ചൊല്ലി ,
ചെമ്മണ്ണിലെറിഞ്ഞവന്‍,
ഞാനിന്ന്,
ഹൃദയമില്ലാത്തവള്‍!

എന്‍റെ പ്രണയാന്വേഷണ പരീക്ഷണങ്ങള്‍ !

2010-08-01T08:39:00.000-07:00

ഏറെ നിരീക്ഷണങ്ങള്‍ക്കും പരീക്ഷണങ്ങള്‍ക്കും അന്വേഷണങ്ങള്‍ക്കുമോടുവില്‍ ഞാന്‍ കണ്ടെത്തി -
ഞാന്‍ ഇത്രമേല്‍ സ്നേഹിച്ച മറ്റൊരാളില്ല ;
എന്നെ ഇത്ര കണ്ടു പ്രണയിച്ച വേറൊരാളില്ല ;
ഞാന്‍ എന്നോട് തന്നെ പ്രണയത്തിലാണ്!

ജന്‍മദിനം

2010-06-27T06:04:00.000-07:00

ഏകയായ് ഞാന്‍ ജനിച്ച നാള്‍
ഏകയാണെന്നെ ഓര്‍മ്മിപ്പിച്ച നാള്‍
ജന്‍മം നല്‍കിയവര്‍ ജന്മദിനത്തില്‍
ഈ ജന്‍മത്തെ വെറുത്ത നാള്‍ !

കൈ പിടിച്ചേല്‍പ്പിച്ചവരും
കരം ഗ്രഹിച്ചവനും
കൈ വിട്ട നാള്‍ , എനിക്കായി
മത്സരിച്ച നാള്‍ !

എനിയ്ക്കും പിറക്കാനിരിക്കുന്ന കുഞ്ഞിനും
ഒരേ മനസ്സെന്നു തിരിച്ചറിയാത്തവര്‍ ,
വിലയെന്തെന്നും മൂല്യമെന്തെന്നും
വേര്‍ തിരിച്ചറിയാത്തവര്‍,
അവരെനിയ്ക്കും കുഞ്ഞിനും
വിലപേശിയവര്‍ !

അടക്കി വച്ചൊരാ ഏങ്ങലുകളില്‍
ഞാനെന്‍ മനസിന്‍ തെറ്റിയ താളം കേട്ടു.
അടിവയറില്‍ തുടിച്ചൊരാ ഹൃദയ താളം
തെറ്റിയ താളത്തെ തിരികെ തന്നു!

ഇനിയും ഉണങ്ങാത്ത മുറിവുകള്‍
അതിലുപ്പു പോല്‍ നീറുന്നു- വീണ്ടുമൊരു ജന്‍മനാള്‍

ഞാന്‍ നിന്റെ ആരാണ് ?

2010-05-25T06:45:00.000-07:00

ഞാന്‍ നിന്റെ ആരാണ് ?
നീയെന്റെ മഴയാണ് !

വേനല്‍ തളര്‍ത്തിയോരെന്‍ മനസ്സില്‍
പെയ്തിറങ്ങിയ മിഥുന മഴ!
വിണ്ടു കീറിയ ഓരോ മുറിവിലും
കുളിരായിറങ്ങിയ മഴ !
ചുട്ടു നീറുന്ന മിഴിയിണകളില്‍
ചുംബനങ്ങള്‍ തന്നൊരാ ചാറ്റല്‍ മഴ !

കണ്ണുകള്‍ കവിഞ്ഞു
കവിളിണയിലൂടുതിര്‍ന്ന്‍
ചുണ്ടിലുറഞ്ഞൊരുപ്പുനീരിനെ
ചുണ്ടാല്‍ ഒപ്പിയെടുത്ത മഴ !

കോരിച്ചൊരിഞൊരെന്‍
പരിഭവങ്ങളെ
ഒരു മിന്നല്‍ച്ചിരിയോടെ,
ക്ഷമയോടെ ചെവികൊണ്ട മഴ !

ഒരു നോക്ക് കാണുവാനായ്
ജനല്‍ തുറന്നയെന്‍-
കവിളത്ത് ജലശീഖരങ്ങളാല്‍
കവിതയെഴുതിയ രാത്രിമഴ!

പൊട്ടല്‍വീണയാ ഓടിലൂടെ
ഇറ്റിറ്റു നീ പെയ്തിറങ്ങിയപ്പോള്‍
തണുത്ത കരങ്ങളാലെന്നെ
കെട്ടിയിട്ടവന്‍,നീയെന്‍ സ്വന്തം!

തൊടികളില്‍ ‍ചാലി-
ട്ടൊഴുകിയപോലെന്‍
ചൊടികളില്‍ നീ,
നീരായിറങ്ങിയപ്പോള്‍
നനഞ്ഞു തോര്‍ന്നൊരാ
പ്രകൃതിയെപ്പോല്‍
നിന്നിലലിയാന്‍
കൊതിച്ചവള്‍ ഞാന്‍

എനിയ്ക്കും നിനക്കും
മാത്രമായ്‌ അറിയുന്ന
രഹസ്യങ്ങള്‍ കാതുകളില്‍ മന്തിച്ച്
നിന്നില്‍ ഭ്രമിച്ച്
നിന്‍ കൂടെ രമിച്ച്
നീ തീര്‍ത്ത കയത്തില്‍
മുങ്ങാംങ്കുഴിയിട്ട്
ഞാനും നീയും
ഒന്നാകുന്ന വര്‍ഷം
അതാണ്‌ നീ ,
എന്റെ പ്രണയം,
എന്റെ മഴ!

എന്താ പ്പോ ഇങ്ങനെ തോന്നാന്‍ ?

2010-04-03T05:21:00.000-07:00

തൊട്ടു മുന്നേ ഇട്ട പോസ്റ്റ്‌ കണ്ടു ശ്രീ എന്നോട് ചോദിച്ചു 'എന്താ പ്പോ ഇങ്ങനെ തോന്നാന്‍ ?'

ഇങ്ങനെ എപ്പോ വേണേലും ആര്‍ക്കു വേണേലും തോന്നാത്രേ ! സമ പ്രായക്കാരന്‍ സുഹൃത്തിനു ഇങ്ങനെ തോന്നിയാല്‍ അത്ഭുതപ്പെടെണ്ടതില്ല , അല്ലെ ?

സുഹൃത്ത്‌ 5 വയസ്സ് ഇളപ്പമാണേല്‍ ? അതെ ഞാന്‍ അമ്പരന്നു.

സുഹൃത്ത്‌ വിവാഹിതയാണേല്‍ ?

സുഹൃത്തിനു 65 വയസ്സാണേല്‍ ?

ആര്‍ക്കും എപ്പോള്‍ വേണമെങ്കിലും തോന്നാവുന്ന ഇഷ്ടം. അത് കലികാലത്തിന്‍റെ വൈകൃതങ്ങളാണോ ? അതോ അവരെല്ലാം എന്‍റെ ഇഷ്ടത്തെ തെറ്റിദ്ധരിച്ചതാണോ ? അതോ എന്‍റെ ഇഷ്ടത്തെ മുഴുവനായി ആവാഹിക്കാനായിരുന്നോ ?

ഞാനും ഇഷ്ടം അല്ലെങ്കില്‍ സ്നേഹം മാത്രമേ കാംക്ഷിച്ചുള്ളൂ. അത് അമൂര്‍ത്തമായിരുന്നു . രൂപം ഇല്ലാത്തത് ! സീമകള്‍ ഇല്ലാത്തത് ! ആരെയും ഞാന്‍ നിരസിച്ചില്ല , ഇഷ്ടത്തെ മനസ്സിലാക്കാന്‍ ശ്രമിച്ചു.

സ്നേഹിക്കുന്നത് തെറ്റല്ലാലോ? സ്നേഹിക്കപ്പെടാന്‍ ആഗ്രഹിക്കുന്നതും ? അല്ലെ പ്രശാന്തേ ?

'ഒത്തിരി ഇഷ്ടാണ് , നിനക്കോ ?' 'അറിയില്ല !'

2010-03-19T07:53:00.000-07:00

ഞാന്‍ സ്വത്വാന്വേഷണത്തിലായിരുന്നു . സ്വയം നഷ്ടപ്പെട്ടെക്കുമോ എന്ന് ഭയക്കുന്ന ഞാന്‍ എന്നെത്തന്നെ അന്വേഷിക്കുന്ന യാത്ര. ആ അന്വേഷണം അവസാനിച്ചത്‌ നിന്നിലായിരുന്നു [അവസാനിപ്പിച്ചതോ?]

നീയൊരു നിലക്കണ്ണാടിയായും, അതില്‍ക്കാണുന്ന മനോഹര രൂപം എന്‍റെതാണെന്നും ഞാന്‍ വിശ്വസിച്ചു. ഒരു പച്ചപ്പട്ടുപാവാടക്കാരിയായി ഞാന്‍ എന്നെക്കണ്ടു. [പച്ചപ്പട്ടുടുത്ത മധുര മീനാക്ഷിയായി നീയെന്നെയും കണ്ടു ].
ഒരു ബാലികയുടെ നിഷ്ക്കളങ്കതയോടെ ഞാന്‍ അതില്‍ നോക്കിച്ചിരിച്ചു

ഇത്രയും ശുദ്ധമായി ഞാന്‍ ആരെയും സ്നേഹിച്ചിട്ടില്ല , ഇത്രയും അന്ധമായി ഞാന്‍ ആരെയും വിശ്വസിച്ചിട്ടില്ല .

ആ കണ്ണുകളില്‍ കണ്ട പ്രതിരൂപത്തില്‍ ആകൃഷ്ടയായി ഞാന്‍ എന്നില്‍ത്തന്നെ മുഴുകിയിരുന്നു . അതിനപ്പുറത്തേയ്ക്ക് ഞാനൊന്നും കണ്ടില്ല. വാസ്തവം ! ഞാന്‍ നിന്നെക്കണ്ടില്ല. നിന്‍റെ മനസ്സ് കണ്ടില്ല. നിന്‍റെ കണ്ണുകളിലെ ചാഞ്ചല്യം കണ്ടില്ല.

"ഇഷ്ടമാണ് സഖീ നിന്നെയെനിക്ക് " [അതിലെന്തു അത്ഭുതം ? ഞാനും നിന്നെ ഒരുപാട് ഇഷ്ടപ്പെടുന്നു ]
"എന്‍റെ ഭ്രാന്തന്‍ ചിന്തകളില്‍ ഞാനിന്നൊറ്റയ്ക്കല്ല പറക്കുന്നത് " [പിന്നെ?]
"എന്‍റെ സ്വപ്നങ്ങളില്‍, കാമനകളില്‍, എല്ലാം നീയാണ് ! നീ വളര്‍ന്നു വലുതായി ഒരു യക്ഷിയായി മാറിയിരിക്കുന്നു. നിന്‍റെ മുടിയിഴകള്‍ക്ക്‌ പനങ്കുലയുടെ അഴക്‌ ,നിന്‍റെ ചിരിയ്ക്കു ഒരു ഗതകാല സ്മരണയുടെ കിലുക്കം ,നിന്‍റെ ശരീരത്തിനു പാലപ്പൂവിന്‍റെ ഗന്ധം, മെല്ലെ അടുത്ത് വന്നു ആ ഗന്ധം മുഴുവനും ആവാഹിക്കാന്‍ മോഹം , നിന്‍റെ കരിയെഴുതിയ കണ്ണുകള്‍, നിന്‍റെ മൂക്കുത്തിയുടെ തിളക്കം, വിയര്‍പ്പും എണ്ണയും പൊടിഞ്ഞ നിന്‍റെ നെറ്റിത്തടം ,
ഹോ ! എനിയ്ക്ക് നിയന്ത്രണം വിട്ടു പോകുന്നത് പോലെ തോന്നുന്നു . ഞാന്‍ ഇങ്ങനൊന്നും പറയരുതായിരിക്കാം , നീ പൊയ്ക്കോളൂ , ദൂരെ പൊയ്ക്കോളൂ "

മനസ്സ് പിടച്ചു പോയി . ചുറ്റിനും ഇരുട്ട് . കാലിനടിയിലെ മണ്ണ് മുഴുവന്‍ ആ തിരതള്ളലില്‍ ഒലിച്ചു പോയിരിക്കുന്നു. ഞാന്‍ പ്രജ്ഞ തിരിച്ചെടുക്കാന്‍ പാടുപെട്ടു .

"ഞാന്‍ ഒരിക്കലും ഇങ്ങനെ കരുതിയിട്ടില്ല . എനിക്കിങ്ങനെയൊന്നും ചിന്തിക്കാന്‍ സാധിക്കില്ല . എനിയ്ക്ക് വിശ്വസിക്കാന്‍ കഴിയുന്നില്ല. നീ നുണ പറഞ്ഞതല്ലേ ? എന്താ, എന്ത് പറ്റി നിനക്ക് ? ഇനി എന്നെ ഒഴിവാക്കാനായി നീ മനപൂര്‍വ്വം കെട്ടിച്ചമച്ച കാരണമോ ഇത് ?
ഇല്ല ഒരിക്കലുമില്ല ! നിന്നില്‍ നിന്നും എന്നെ പിരിയ്ക്കാനോ ? എനിക്കതിനു സാധിക്കില്ല "

"അല്ലയോ വൃക്ഷമേ ഇതാ ഈയരുകില്‍ ഞാന്‍ നിന്നോട്ടേ? ഈ പൊരി വെയിലത്ത്‌ എന്നെ നീ ഒറ്റയ്ക്കാക്കല്ലേ ! എനിയ്ക്ക് പിടിച്ചു നില്‍ക്കാനാവില്ല . ഞാന്‍ തളര്‍ന്നു പോകും . ഞാന്‍ മരിച്ചു പോകും . ഇത്തിരിത്തണലല്ലേ ഞാന്‍ ചോദിച്ചുള്ളൂ , എന്തിനാണ് നീയെന്നെ ഒരു പരാദസസ്യത്തെ കണക്കെ വലിച്ചെറിയുന്നത് ? ഇനി ഞാന്‍ എന്തെങ്കിലും തെറ്റായി പറഞ്ഞോ ? പെരുമാറിയോ ? എന്താണ് നിനക്കിങ്ങനെയൊക്കെ തോന്നാന്‍ ?"

"ഇല്ല , ഇതൊന്നും നിന്‍റെ തെറ്റല്ല . എന്‍റെ മാത്രം തെറ്റാണ് . നീയൊരു കളയല്ല , ചെറിയ വള്ളിച്ചെടിയുമല്ല , വൃക്ഷത്തിന്‍റെ തണല്‍ പറ്റാന്‍ . നീ പ്രകൃതിയാണ് , ശക്തിയാണ് . വേണമെന്ന് വച്ചാല്‍ നിനക്ക് ആ സൂര്യനെത്തന്നെ പിടിച്ചു കെട്ടാം . അല്ലെങ്കില്‍ ഒരു മേഘം കണക്കെ അരുണനെ മറച്ചു അവന്റെ ചൂടും വെളിച്ചവും തടയാനുള്ള കഴിവുണ്ട് നിനക്ക് !"

"എന്തിനാണ് നീയെന്നെ ഓടിക്കുന്നത് ? എന്തിനെയാണ് നീയീ പേടിക്കുന്നത് ? "

"ഒരു വലിയ കാന്തത്തിനരുകില്‍ ഒരു ചെറിയ കാന്തം ചെന്ന് പെട്ടാലുണ്ടാകുന്ന അതേ ഭയമാണ് എനിക്കിപ്പോള്‍ അനുഭവപ്പെടുന്നത് "

"ആപ്പോള്‍ ഞാന്‍ ദൂരെപോയാല്‍ എല്ലാം ശരിയാകുമെന്നോ ?", കണ്ണുകള്‍ നിറഞ്ഞു വന്നു . രോഷം ആളിക്കത്തി , പിന്നെ അവിടെ നിന്നില്ല , തിരികെ എന്‍റെ കൂട്ടിലേയ്ക്ക്‌ പറന്നു .

മനസ്സില്‍ നിന്നിളക്കാന്‍ ശ്രമിച്ചപ്പോള്‍ മനസ്സിലായി , വേരുകള്‍ ആഴങ്ങളിലാണെന്ന് . ചില വേരുകള്‍ പൊട്ടുകയും അതില്‍ നിന്ന് ചോര പോടിയുന്നതുമായുള്ള നൊമ്പരം. വേര്‍തിരിക്കാന്‍ അസാധ്യം ! എന്‍റെ നിലനില്‍പ്പു തന്നെ നീയാണെന്ന തോന്നല്‍. അല്ലെന്നു നീയെങ്ങനെ സമര്‍ത്ഥിച്ചാലും! എന്നെ ഞാന്‍ അറിയുന്നതിനേക്കാള്‍ നീയെന്നെ അറിഞ്ഞിരിക്കുന്നു. പറയാതെ എത്രയോ കാര്യങ്ങള്‍ നീയീ കണ്ണുകളില്‍ വായിച്ചിരിക്കുന്നു. ഒരു മൂളലില്‍ നിന്നും പോലും എന്‍റെ മനസ്സില്‍ നിന്നും നിന്‍റെ മനസ്സിലേയ്ക്കുള്ള ദൂരം നീയെത്ര കൃത്യമായി ഗണിച്ചിരിക്കുന്നു . ഈ ശരീരത്തിനും അപ്പുറത് ഒരു മനസ്സും ആത്മാവും ഉണ്ടെന്നു കരുതിയ ലോകത്തെ ഏക പുരുഷന്‍ നീയായിരിക്കും. പക്ഷെ എനിക്ക് നീ സുഹൃത്താണ്! എന്‍റെ സ്നേഹത്തിനു അതിര്‍വരമ്പുകള്‍ ഞാന്‍ ഒരിക്കലും എവിടെയും നിശ്ചയിക്കാറില്ല . എങ്കിലും അതിനിങ്ങനെ ഒരു മാനം കാണണമെന്നുണ്ടോ ? ,
എന്നോട് തന്നെ യുദ്ധം ചെയ്തിട്ട് കാര്യമില്ലെന്ന് മനസ്സിലാക്കി തിരികെ ഞാന്‍ പറന്നിറങ്ങി .

"അറിയാമായിരുന്നല്ലോ ദുഷ്ടാ എനിക്ക് പറന്നു പോകാന്‍ സാധിക്കില്ലെന്ന് ?, ഞാനൊരു പാവമല്ലേ , ഇതെല്ലാം തുറന്നു പറഞ്ഞു നീയെന്തിനാ എന്നെ വിഷമിപ്പിച്ചത് ? എല്ലാം നിന്‍റെ സ്വകാര്യമായി വയ്ക്കാമായിരുന്നില്ലേ? "

"ഇത് പറഞ്ഞില്ലെങ്കില്‍ ഞാന്‍ നിന്നോട് ചെയ്യുന്ന തെറ്റ് പോലെ എനിയ്ക്ക് തോന്നി "

"എനിക്കറിയില്ല ഇതിനു എങ്ങനെ പ്രതികരിക്കണം എന്ന് "

"അതെ , സ്ത്രീകള്‍ ഇത്രയും നന്നായി ഉപയോഗിക്കുന്ന വേറെ പദമില്ല. 'അറിയില്ല !'. അതൊരു രക്ഷപെടലാണ് , സത്യം പറയാതിരിക്കാനുള്ള തത്രപ്പാടിലായിരിക്കും അവരപ്പോള്‍ . 'അതെ' എന്ന് തന്നെയാണ് അതിനര്‍ത്ഥം"

"സമ്മതിച്ചു തരില്ല ഞാന്‍ "

"സമ്മതിക്കാതിരിക്കാന്‍ നിനക്ക് നിവൃത്തിയില്ല "

"വേണ്ട, ഒരു മത്സരത്തിനു ഞാനില്ല . അടിയറവു പറഞ്ഞിരിക്കുന്നു. ഒരു പാവമല്ലേ ഞാന്‍ , ഈ മുഖം മൂടി ഇവിടിരുന്നോട്ടെ . അതിനെ ഇളക്കണ്ട ! സ്നേഹത്തിന്‍റെ ആഴം ഞാന്‍ അറിഞ്ഞിരുന്നില്ല . സുഹൃത്തുക്കളായിത്തന്നെ തുടരാം [എന്ന് സ്വയം വിശ്വസിപ്പിച്ചോ ?]"

"എങ്കില്‍ ശരി, എല്ലാം നിന്‍റെ ഇഷ്ടം !"

"അപ്പോള്‍ നിന്‍റെയിഷ്ടം ?"

"അത് എന്‍റെ സ്വാതന്ത്ര്യമല്ലേ ? നിന്‍റെ അനുവാദം എനിക്കാവശ്യമില്ലലോ ?"

"എന്തോ , എനിക്കറിയില്ല !".

സഹയാത്രികന് ....

2009-08-30T09:33:00.000-07:00

അഞ്ചു വര്ഷം മുന്‍പ് ഒരോണക്കാലത്ത് യാത്രയ്ക്കിടയില്‍ പരിചയപ്പെട്ട സഹയാത്രികന്‍ , അയാളെ ഞാന്‍ പിന്നെ കണ്ടില്ല , കേട്ടില്ല , പക്ഷെ എല്ലാ ഓണത്തിനും പ്രിയ സുഹൃത്തേ ഞാന്‍ നിന്നെ ഓര്‍ക്കാറുണ്ട് ! ഈ പോസ്റ്റ് പുഴകളെ സ്നേഹിച്ച , കവിതകളെ സ്നേഹിച്ച എന്റെ പ്രിയ സഹയാത്രികന് ..

ഓണം മലയാളിയ്ക്കെന്നും ഉത്സവമാണ് , പുറം നാട്ടിലുള്ളവര്‍ക്കാണേല്‍ ഓണം ഗൃഹാതുരത സൃഷ്ടിക്കുന്ന ഒരു നൊമ്പരമാണ് . ഞാനും സ്ലീപ്പര്‍ ടിക്കെറ്റില്‍ നാട്ടിലേയ്ക്ക് വണ്ടി കയറി . കിട്ടിയ ബര്‍ത്തിനടുതെങ്ങും ഒരു പെണ്തരിയില്ല . എന്തോ ഒരു ഭയം , എന്റെ വലിയ കണ്ണടയിലൂടെ ചുറ്റുമിരിക്കുന്നവരെ തുറിച്ചു നോക്കി . അവരൊന്നു പേടിച്ചോ ? ഞാനും ! ബാഗിലിരുന്ന ഒരു ഇംഗ്ലീഷ് നോവല്‍ പുറത്തെടുത്തു വായന തുടങ്ങി . ജാടയാണെന്ന് അവരും കരുതട്ടെ. എല്ലാവരും മലയാളികള്‍ . എന്നാലും മിണ്ടാന്‍ ഭയം , ഗുരുവായൂരപ്പനെ ആഞ്ഞു വിളിച്ചു . എന്നും കൂടെയുണ്ടെന്നും ഒരിക്കലും കൈവിടില്ലെന്നും ഉള്ള വിശ്വാസമോ അന്ധവിശ്വാസമോ ആണു എനിക്കെന്നും ബലം .

രാത്രിയായി , കഴിക്കാന്‍ ഒന്നും കിട്ടിയില്ല , ഏതോ സ്റ്റേഷന്‍ , എല്ലാരും ഇറങ്ങി ഭക്ഷണപൊതി വാങ്ങുന്നു . വയര്‍ കരഞ്ഞു തുടങ്ങി , ഞാന്‍ മെല്ലെ ചാടി ഇറങ്ങി , bread omlet എന്നാരോ വിളിച്ചു പറഞ്ഞു , ആയിക്കോട്ടെ , ഞാന്‍ തലയാട്ടി . വണ്ടി നീങ്ങാന്‍ തുടങ്ങി , എനിക്കയാള്‍ നീട്ടിയ പൊതിയിലെയ്ക്കും ട്രെയിനിനെയും ഞാന്‍ മാറി മാറി നോക്കി , പിന്നെ ഓടി കേറുകയായിരുന്നു. പുറകെ എന്റെ പൊതിയുമായി അരുണ്‍ ഓടി കേറി , അപ്പോളാണ് ഞാന്‍ അയാളെ ശ്രദ്ധിക്കുന്നത് , ആറടി മൂന്നിന്ച്ചു പൊക്കം . അമ്മേ !

'താങ്ക്സ് !' ഞാന്‍ പൊതി വാങ്ങി ചിരിച്ചു . സീറ്റില്‍ വന്നിരുന്നു കഴിച്ചു .

9 കഴിഞ്ഞു ,എല്ലാരും കിടക്കാനുള്ള തിരക്കിലായി . ഞാന്‍ അരുണിനോട് ചോദിച്ചു , 'ഇപ്പൊ ബര്‍ത്ത് ഒഴിഞ്ഞു തരണോ ?' അയാളുടെ കണ്ണ് തള്ളി , 'എന്റെ ഈശ്വരാ , കുട്ടി മലയാളി ആണോ ? എന്നിട്ടാണോ മിണ്ടാതിരുന്നത് ?' . ഞാന്‍ മന്ദഹസിച്ചു (ചമ്മിയ ചിരിയെന്നും വ്യാഖ്യാനിക്കാം ) . 'എനിക്കുറക്കം വരുന്നില്ല , ഞാന്‍ മാറിത്തരണോ ?' ഞാന്‍ ആവര്‍ത്തിച്ചു . 'എനിക്കും ഉറക്കം വരുന്നില്ല , നമുക്ക് സംസാരിച്ചിരിക്കാം '. അരുണ്‍ സമാധാനിപ്പിച്ചു . ഒറ്റയ്ക്കാണെന്ന ഭയം എന്നെ വീണ്ടും അലട്ടി.

ഞങ്ങള്‍ പരിചയപ്പെട്ടു . അത്രേം സംസാരിക്കുന്ന ഒരാളെ ഞാന്‍ അന്ന് വരെ കണ്ടിട്ടില്ലായിരുന്നു . എന്നും ഒരു നല്ല ശ്രോതാവായിരുന്ന ഞാന്‍ കൌതുകത്തോടെ അയാളുടെ കഥകള്‍ കേട്ടു . വീടിനെ കുറിച്ച് , നാടിനെ കുറിച്ച് , കവിതകളെകുറിച്ച് , കഥകളെ കുറിച്ച് പിന്നെ നദികളെ കുറിച്ചും ....

'നമ്മള്‍ വരുന്ന വഴിയ്ക്ക് കൃഷ്ണാ നദിയെ കണ്ടിരുന്നോ ? , അതെങ്ങനാ താന്‍ മിണ്ടിയില്ലാലോ , സാരല്ല, തിരികെ വരുമ്പോള്‍ കാണാന്‍ മറക്കണ്ട. '

'എന്റെ വീട് തുംഗഭദ്ര യ്ക്കരുകിലാണ് , ഇപ്പോള്‍ വെള്ളമില്ല , പക്ഷെ മഴ വരുമ്പോള്‍ അവളെ ഒന്നു കാണണം , എന്ത് സുന്ദരിയാണെന്നൊ , അവളെ ക്കാണാന്‍ ദൂരെ നിന്നു പോലും ആളുകള്‍ വരും ! മഴ പെയ്യണ നേരത്ത് ഉമ്മറത്തിരുന്നു ഉറക്കെ പാടണം "കുമ്മാട്ടീ ....." താന്‍ കേട്ടിട്ടുണ്ടോ അത് ? ആട്ടെ തനിക്കിഷ്ടമുള്ള പുഴയേതാണ് ? , പെരിയാറിനെയാണ് എനിക്കിഷ്ടം . ....ആനന്ദിന്റെ ആള്‍ക്കൂട്ടം വായിച്ചിട്ടുണ്ടോ എനിക്കെന്നും ഇഷ്ടപ്പെട്ട കൃതി അതാണ്‌ ' സംസാരം പുലരും വരെ നീണ്ടു . ഞങ്ങള്‍ ഉറങ്ങാന്‍ കിടന്നു . രാവിലെ ഒന്പതു മണിക്കെഴുന്നേറ്റപ്പോള്‍് കണ്ടത് , മറ്റു അഞ്ചു പേരും മുന്‍പിലെ സീറ്റില്‍ തിക്കി തിരക്കി ഇരിക്കുന്ന കാഴ്ചയാണ് . ചാടിയെണീറ്റ് പല്ലൊക്കെ തേച്ചു തിരിച്ചു വന്നപ്പോഴേയ്ക്കും മറ്റൊരു പൊതിയുമായി വീണ്ടും അരുണ്‍ . ബ്രേക്ക്‌ ഫാസ്റ്റ് ! എനിക്കായി കരുതിയതാണ് . വീണ്ടും ചമ്മിയ ചിരിയുമായി ഞാനത് വാങ്ങി . അരുണിന്റെ കൂടെ ഉണ്ടായിരുന്ന അയാളുടെ കൂട്ടുകാരെന്റെ അച്ഛനെ പരിചയപ്പെട്ടു . അയാള്‍ ഞങ്ങള്‍ക്ക് മുന്പിറങ്ങും.

അദ്ദേഹമിറങ്ങി ക്കഴിഞ്ഞു അരുണ്‍ പറഞ്ഞു , 'തനിക്കറിയുമോ അദ്ദേഹം ചോദിക്കുകയായിരുന്നു , നമ്മള്‍ എത്ര കാലമായി അറിയുന്നവരാണെന്ന് . ഇന്നലെ മുതലെന്ന് ഞാന്‍ പറഞ്ഞിട്ട് , ആള്‍ സമ്മതിക്കുന്നില്ല . ' ഞങ്ങള്‍ പൊട്ടിച്ചിരിച്ചു .

'കാണാം (ഇനിയും കാണുമോ ) ' ഞങ്ങള്‍ പിരിഞ്ഞു . പിന്നെ കണ്ടതുമില്ല കേട്ടതുമില്ല . ചില ബന്ധങ്ങള്‍ ഇങ്ങനെയാണ് ,ഒരു മാത്രയില്‍് ജീവിച്ച്, അടുത്ത മാത്രയില്‍ പൊലിഞ്ഞ് ! ചിലത് ഒരു ജന്മം മുഴുവന്‍ ഒരുമിച്ചിരുന്നാലും ചേരാത്തത് !

അന്ന് മുതല്‍ എല്ലാ ഓണത്തിനും ആ നല്ല മനസ്സിനെ ഞാന്‍ ഓര്‍ക്കും . ഒരിക്കല്‍ കൂടി കണ്ടിരുന്നെങ്കില്‍ എന്നാശിയ്ക്കും .

സഹയാത്രികന് സ്നേഹപൂര്‍വ്വം ....

കളിക്കൂട്ടുകാരി

2009-08-04T10:18:00.000-07:00

alladin കണ്ടിരിക്കെ സുന്ദരിയായ ജാസ്മിനെ ചൂണ്ടി ഞാന്‍ ചോദിച്ചു ,
'ഉണ്ണീ, ജാസ്മിന്‍ സുന്ദരിയാ അല്ലെ ? അവളെ കല്യാണം കഴിപ്പിച്ചു തരട്ടെ '.
ഉണ്ണി ചിരിച്ചു കൊണ്ട് പറഞ്ഞു 'വേണ്ടാ '.
'അതെന്താ അവള്‍ സുന്ദരിയല്ലേ ?',
'ഉണ്ണി ഗൌര്യെയാ കല്യാണം കഴിക്കുന്നെ !'
ഒരു നേരം പോക്കിന് ചോദിച്ചതായിരുന്നു , പക്ഷെ ഉത്തരം എന്നെ ഞെട്ടിച്ചു , അവനു മൂന്ന് വയസ്സാകാന്‍ ഇനിയും രണ്ടു മാസം ബാക്കി .

ഉണ്ണിയുടെ കളിക്കൂട്ടുകാരിയാണ് അപ്പുറത്തെ വീട്ടിലെ രണ്ട വയസ്സ്കാരി ഗൌരി .

ഇന്ന് രാവിലെ ഉണ്ണിയുടെ അച്ഛന്‍ ഇറങ്ങിയപ്പോള്‍ അവള്‍ ചോദിച്ചു ,
'അച്ഛാ എനിക്കും തര്വോ ഒരു ഉമ്മ ?', പ്രവാസിയായ അച്ഛനെ ഓര്മ വന്നതില്‍ പിന്നെ കുഞ്ഞു കണ്ടിട്ടില്ല . ഉണ്ണിക്കച്ചന്‍ ഉമ്മ കൊടുക്കണ കണ്ടപ്പോ അവള്‍ക്കും കൊതിയായി കാണും .

ഉണ്ണീടെ അച്ഛന്‍ ആ കുഞ്ഞിക്കവിളിലും കൊടുത്തു ഒരു കുഞ്ഞുമ്മ !

ജീവപര്യന്തം

2009-07-29T10:37:00.000-07:00

വിരഹം വേദനയാണ് . ഏകാന്തത ഇരുട്ടാണ്‌ . ശ്വാസം കിട്ടാതെ വെളിച്ചം കാണാതെ ആത്മാവ് പിടയ്ക്കുന്നത്‌ പോലെ . വീണ്ടും ആ ഇരുട്ട് മുറിയില്‍ അടയ്ക്കപ്പെട്ടത്‌ പോലെ !

ആയമ്മ അടച്ചിട്ട, മണ്ണെണ്ണ യുടെ മണമുള്ള തണുത്ത കുടുസ്സ് മുറിയില്‍ , മൂന്നു വയസ്സ്കാരി കല്യാണി തപ്പിത്തടഞ്ഞു . തല്ലി ക്കരഞ്ഞിട്ടും അനങ്ങാത്ത തടിയന്‍ സാക്ഷകള്‍ ! ഒടുവില്‍ കരഞ്ഞു തളര്‍ന്ന് വിരല്‍ ചപ്പി ഉറങ്ങുമ്പോള്‍ തറയോടിന്‍റെ തണുപ്പ് . അങ്ങിനെ പല ദിനങ്ങള്‍ .

ആ മുറി , ആ അന്ധകാരം , ആ തണുപ്പ് ! കല്യാണിയ്ക്കിനിയും മുക്തി നേടാന്‍ പറ്റാത്ത ജീവപര്യന്തം തടവറ.

ചെന്നൈ സില്‍ക്സ്‌

2009-07-10T10:15:00.000-07:00

കഴിഞ്ഞ തിങ്കളാഴ്ച രാവിലെ പത്രത്തിന്റെ മുഖം കണ്ടു ഞാനൊന്നു ഞെട്ടി , അടുത്ത പത്രത്തിലും അത് തന്നെ സ്ഥിതി , പിന്നെയും പിന്നെയും ഞെട്ടിയത് ദേശാഭിമാനി കണ്ടപ്പോള്‍ .

ഒരു പുറം നിറയെ പരസ്യം , അതും മുന്‍ പേജില്‍ , 'ചെന്നൈ സില്‍ക്സ്‌ കൊച്ചിയില്‍ ഇന്നു പ്രവര്‍ത്തനം ആരംഭിക്കുന്നു . '.

'കഷ്ടം തന്നെ '.

എനിക്കങ്ങനെ തോന്നി , വേറെ ആര്‍കെങ്കിലും അങ്ങിനെ തോന്നിയിരിക്കുമോ ?

പണത്തിനു മേല്‍ പരുന്തും പറക്കുമല്ലോ അല്ലെ ?

ഒന്നാം പിറന്നാള്‍

2009-06-25T23:06:00.000-07:00

അങ്ങിനെ എന്റെ ബ്ലോഗിന്റെയും ഒന്നാം പിറന്നാള്‍ എത്തി ! :)

രാവിലെ അമ്പലത്തില്‍ പോയി തൊഴാം ,
ഉച്ചയ്ക്ക്‌ നാക്കിലയിട്ട് ഒരു സദ്യയാവാം
വൈകീട്ട് കേക്ക് മുറിച്ച് ഒരു ബുഫേയുമാവാം

എന്നൊക്കെ മോഹിക്കാം ,
ഇതൊന്നും ബൂലോകരുമായി പങ്കിടാന്‍ പറ്റൂല്ലാലൊ ,

ഇതിലെ പോകുന്നവര്‍ക്കായി......

വെള്ളമിറക്കാന്‍.........

ഞാനിതു ഡെഡിക്കേറ്റ് ചെയ്യുന്നു .

പ്രണയവും ഒബ്ജക്റ്റ് ഓറിയെന്‍്റ്റഡ് പ്രോഗ്രാമ്മിങ്ങും

2009-06-12T08:57:00.000-07:00

" എനിക്കിനി എന്ത് ചെയ്യണംന്നറിയില്ല , അയാള്‍ പറഞ്ഞു എല്ലാം മതിയാക്കാമെന്ന് , അയാള്‍ക്ക്‌ അച്ഛനേം അമ്മയെയും ധിക്കരിക്കാന്‍ പറ്റില്ലത്രേ. എന്‍റെ അച്ഛനെ വിളിച്ച് കാര്യങ്ങള്‍ സംസാരിച്ചു, വേറെ കല്യാണം നോക്കിക്കോളാന്‍് പറഞ്ഞു, നീണ്ട 3 വര്‍ഷത്തെ പ്രണയത്തെ ഞാന്‍ എങ്ങനെ മറക്കും? ഇനി എനിക്ക് വേറൊരാളെ സ്നേഹിക്കാന്‍ പറ്റുമോ? എനിക്ക് ജീവിതം മതിയായി "

അവള്‍ ഏങ്ങലടിച്ച് കരഞ്ഞു .

'നട്ടെല്ലില്ലാത്ത കഴുത , അവനെ ഒരിക്കലെ കണ്ടിട്ടുള്ളു , അന്നേ എനിക്കിഷ്ടപ്പെട്ടില്ല , ഇതൊന്നും പറ്റില്ലേല്‍ ഈ പണിക്ക്‌ പോവരുതായിരുന്നു , ഒരു നേരമ്പോക്കിന് സ്നേഹിക്കാന്‍ വേറെ എത്ര പേരെ കിട്ടിയേനെ' മനസ്സില്‍ വന്ന എല്ലാ ചീത്തയും ഞാന്‍ മനസ്സില്‍ തന്നെ വിളിച്ചു. പുറത്തെങ്ങാനും പറഞ്ഞാല്‍ അവള്‍ സമ്മതിക്കില്ല.

ഞാന്‍ അവളുടെ തലയില്‍ കോതിക്കൊണ്ട് പറഞ്ഞു " എനിക്കറിയാം അയാളെ മറക്കാന്‍ പറ്റില്ലെന്ന്, മറക്കണ്ട , ഒന്നും മതിയാക്കുകയും വേണ്ട . പിന്നെ ഒരാളെ കൂടെ സ്നേഹിക്കുന്ന കാര്യം , അതിനെന്താ ഇത്ര ബുദ്ധിമുട്ട് ? "

"എന്താ ഈ പറയണേ , എനിക്കൊന്നും മനസ്സിലാവുന്നില്ല "

" സീ , ഇറ്റ്‌ ഈസ്‌ ലൈക്‌ ഒബ്ജക്റ്റ് ഓറിയെന്‍്റ്റഡ് പ്രോഗ്രാമ്മിങ്. സ്നേഹം എന്ന ക്ലാസിനു പല ഒബ്ജക്റ്റ് ഉണ്ടാകും , ഉദാഹരണമായി , അച്ഛനേം അമ്മയെയും സ്നേഹിക്കുന്നു , സഹോദരങ്ങളെ സ്നേഹിക്കുന്നു , എത്ര സുഹൃത്തുക്കളുണ്ടോ അത്രേം പേരെ നമ്മള്‍ സ്നേഹിക്കുന്നു , മക്കള്‍ ഒന്നായാലും പത്തായാലും സ്നേഹം പകുക്കപ്പെടുന്നുണ്ടോ ? അത്രേം ഇരട്ടി സ്നേഹം ഉല്പ്പാദിപ്പിക്കപെടുന്നു .

ഒന്നാം ക്ലാസിലെ കൂട്ടുകാരിയെ ഓര്‍മ്മയുണ്ടോ ? ആദ്യം ഇഷ്ടം പറഞ്ഞവനെ ? നാലാം ക്ലാസ്സിലെ ശത്രുവിനെ ? നാലയല്‍വക്കം അപ്പുറത്തെ വീട്ടുകാരിയെ ? ഇത്രേം പേരെ മറക്കാമെങ്കില്‍ അയാളെയും മറക്കാം . ഇതു എന്നും വേദനയായിരിക്കാം , പക്ഷെ നമുക്ക്‌ വിധിച്ചവന്‍ മോശമാവണം എന്നില്ലാലോ ? ആ സന്തോഷത്തില്‍ ഈ വേദന മറന്നു പോകും . "

കലങ്ങിയ ഉണ്ടക്കണ്ണുകള്‍് മിഴിച്ചെന്നെ അവള്‍ നോക്കി ,

പിന്നെ ഒരു പൊട്ടിച്ചിരി ആയിരുന്നു ,"എന്നാലും ഒബ്ജക്റ്റ് ഓറിയെന്‍്റ്റഡ് പ്രോഗ്രാമ്മിങ് കണ്ട് പിടിച്ചയാള്‍ പോലും ഇതിനിങ്ങനേം ഉപയോഗം കാണുമെന്ന് കരുതിക്കാണില്ല ."

ഞാനും ആ ചിരിയില്‍ ചേര്‍ന്നു .

ഇങ്ങനേം രണ്ട് കമ്പ്യൂട്ടര്‍ സയന്‍സ് ടീച്ചര്‍മാര്‍!

അക്ഷര മുറ്റത്തേയ്ക്ക്

2009-06-01T11:11:00.000-07:00

ഇന്നു ജൂണ്‍ ഒന്ന് , ഉണ്ണിയും അക്ഷരം പഠിക്കാന്‍ പുറപ്പെട്ടു , മുയല് ബാഗ്‌ , വാട്ടര്‍ ബോട്ടില്‍ , പോപ്പി കുട , snacks box . എല്ലാം എടുത്ത്‌ ഉണ്ണി പടിയിറങ്ങി നാലടി കഴിഞ്ഞില്ല , സ്വിച്ചിട്ട പോലെ ആള്‍ നിന്നു .

'ഉണ്ണിയ്ക്ക് പനിയാ , ഉണ്ണിയ്ക്ക് സ്കൂളില്‍ പോണ്ടാ. '

ഞാനും വിട്ടില്ല , നിന്നെ കൊണ്ടേ പോകുള്ളൂന്നു ഞാനും . വിലയേറിയ ഒരു casual leave കളഞ്ഞിട്ടാ അവനെ അംഗനവാടിയില്‍് കൊണ്ടിരുതാമെന്നു കരുതിയത്‌ . അവന്‍ കുറുമ്പനാണേല്‍് ഞാന്‍ കുറുമ്പന്ടെ അമ്മയാ ! ഹും !

അവന്‍ അടുത്ത സ്വിച്ചിട്ടു . അച്ഛാ , അമ്മൂമ്മേ അച്ചാച്ചാ ...... വലിയ വായില്‍ നെലോളി തുടങ്ങി . ഇപ്രാവശ്യം കുറുമ്പന്ടെ അമ്മ തോറ്റു .
ഒടുക്കം ഒരു മഞ്ചില്‍ കരാറുറപ്പിച്ചു.

അങ്ങനെ രാമന്‍ കുട്യേട്ടന്റെ കടയില്‍ നിന്നും വാങ്ങിയ ഒരു മഞ്ചും മഞ്ചി ഉണ്ണിക്കുട്ടന്‍ അക്ഷര മുറ്റത്തെത്തി .
അവിടെ എത്തിയപ്പോള്‍ മഞ്ച് തീര്‍ന്നു , ശങ്കരന്‍് വീണ്ടും തെങ്ങില്‍് കേറി .

'അമ്മ പോണ്ടാ ......'

ഇപ്രാവശ്യം ഉണ്ണിക്കുട്ടന്‍ മനം നൊന്ത് കരഞ്ഞതാണ് ,
വര്‍ഷങ്ങള്‍ക്കപ്പുറം അമ്മ പോകുന്നത് നിസ്സഹായായി നോക്കി നിന്ന കല്യാണിയെ ഓര്‍മ വന്നു .

എന്‍റെ മനസ്സ്‌ വിതുമ്പി പോയി , ഞാന്‍ ദയനീയമായി ടീച്ചറെ നോക്കി ,
'ഞാന്‍ കൂടി ഇരുന്നോട്ടെ ?'

അയല്‍വക്കം കൂടിയായിരുന്നത് കൊണ്ടാകാം അവര്‍ സമ്മതിച്ചു .

ഞങ്ങള്‍ മറ്റ് കുട്ടികളുടെ കസര്‍ത്തുകള്‍ കണ്ട് രസിക്കാന്‍ തുടങ്ങി , കുറച്ച് കഴിഞ്ഞപ്പോഴേയ്ക്കും എല്ലാരുടെയും ശ്രദ്ധ ഞാനായി . എല്ലാരും ഉണ്ണീടെ അമ്മയെ നോക്കി ഇരിയ്ക്കാന്‍ തുടങ്ങി . കാര്‍ത്തുവിന്റെ കണ്ണ് നിറഞ്ഞു , ജെഫിന്‍് വിതുമ്പി തുടങ്ങി ... ' അമ്മേ കാണണം ...'

ടീച്ചര്‍ കുഴഞ്ഞു , ഞാന്‍ മൊബൈല് എടുത്തു ' ഹലോ , ജഫിന്റെ അമ്മയല്ലേ ? വേഗം വരണേ ! ആ.... ഊം...... ശരി ......വയ്ക്കട്ടെ !'
'മോനേ കഞ്ഞി കുടിക്കുംമ്പോഴെയ്ക്കും വരാമെന്ന് അമ്മ പറഞ്ഞു '

പാവം മൂന്ന് വയസ്സുകാരന്‍ വിശ്വസിച്ചു .
അപ്പൊ ദാ എന്‍റെ വിരുതന്‍ ഉണ്ണി അമ്മയെ സ്നേഹിക്കാന്‍ തുടങ്ങി , കഴുത്തില്‍ വട്ടം പിടിച്ച് ഉമ്മ വയ്ക്കുന്നു, കിന്നാരം പറയുന്നു , .... പാവം കുട്ടികള്‍,
ഞാന്‍ മാറിയിരുന്നു .

കുറച്ച് കഴിഞ്ഞ് ഉച്ചക്കഞ്ഞിയ്ക്ക് നേരായി . കോണ്‍വെന്റില്‍ പഠിച്ച എനിയ്ക്ക്‌ അംഗനവാടി പുതിയ അനുഭവമാണ്.

കഞ്ഞി കുടി കഴിഞ്ഞ് പാട്ടുകള്‍ പാടാന്‍ തുടങ്ങി , ഉണ്ണീടെ അമ്മ പാടണം. [ വേണോ മക്കളെ? ]

പിന്നെ ഉണ്ണീം ഉണ്ണീടെ അമ്മേം തക്ര്‍്ത്തില്ലേ?

' അ ! ആന ആറാട്ട് , ഇ ! ഈച്ച ഈരണ്ട് ...... [ മനോരമ യുടെ ഓണ്‍ലൈന്‍ ബാലരമയില്‍ നിന്നും ഞങ്ങള്‍ പഠിച്ചതാ ]

പിന്നീട് എല്ലാരും സന്തോഷത്തോടെ റ്റാ റ്റാ പറഞ്ഞു ഉണ്ണിയെ യാത്രയാക്കി .

ഇനി നാളെ അമ്മൂമ്മ നോക്കിക്കോളും ! രക്ഷപെട്ടു !

വെള്ളം

2009-05-04T21:57:00.000-07:00

രാത്രിയിലെപ്പോഴോ കേട്ട ബീപ് ശബ്ദം ഞാന്‍ ഗൌനിച്ചില്ല , പിറ്റേന്ന് രജിസ്റ്ററില്‍ ഒപ്പിട്ടു തുടങ്ങിയപ്പോള്‍ ആ sms ബീപ് ഓര്‍ത്തു. മൊബൈല്‍ എടുത്ത്‌ നോക്കിയപ്പോള്‍ അതാ കിടക്കുന്നു പാതിരാത്രിയില്‍ എത്തിയ അമ്മയുടെ സന്ദേശം .
ഒരൊറ്റ വാക്ക്

'വെള്ളം !'

നെഞ്ച് കിടുങ്ങിപ്പോയി , ഞാന്‍ കസേരയില്‍ തളര്‍ന്നിരുന്നു . അമ്മയെ തിരികെ വിളിച്ചു , വിറയാര്‍ന്ന ശബ്ദത്തില്‍് അമ്മ പറഞ്ഞു
'മോനേ , അമ്മയ്ക്ക് പനിയാണ് , വെള്ളമെടുത്ത് തരാന്‍ ആരുമില്ല '.

പെണ്മക്കളെ കൈ പിടിച്ചയച്ചതിനു ശേഷം അമ്മ ഒറ്റയ്കാണ് . എനിയ്ക്ക്‌ ചുറ്റും ലോകം കീഴ്മേല്‍ മറിയുന്നത് പോലെ , ഇപ്പോള്‍ പുറപ്പെട്ടാല്‍ തന്നെ അഞ്ച് മണിക്കൂറെടുക്കും അവിടെയെത്താന്‍് ! ഞാന്‍ അനുജത്തിയെ വിളിച്ചു . അവള്‍ പുറപ്പെട്ടിരിക്കുന്നു . കുറച്ചു സമാധാനമായി . ഞാന്‍ അമ്മയെ സമാധാനിപ്പിച്ചു . അമ്മ എന്തൊക്കെയോ പുലമ്പുന്നു , കുറേയൊന്നും മനസ്സിലായില്ല , ഒടുക്കം ഞാന്‍ കേട്ടു , 'മതിയായി '. ഫോണ്‍ കട്ടായി .

എന്ത് മതിയായി ?
എനിക്ക് ജീവന്‍ തന്ന ജീവന്‍ , എനിക്ക് ജീവന്റെ തുള്ളിയായ മുലപ്പാല്‍ തന്ന അമ്മ , ഞാന്‍ ആദ്യം ഉച്ചരിച്ച വാക്ക് , എഴുതിയാല്‍ തീരുമോ ?
ഒരു തുള്ളി വെള്ളം കൊടുക്കാന്‍ യോഗമില്ലാതായല്ലോ എനിയ്ക്ക്‌ !

ഞാന്‍ ഉണ്ണീടെ അച്ഛനെ വിളിച്ചു , ' നീ പോയാല്‍ എങ്ങനാ ഇവിടുത്തെ കാര്യങ്ങള്‍ , അവിടെ നിന്റെ അനുജത്തിയില്ലേ ? ' .

എന്ത് പറയാന്‍ , ഓടി പോയാലോ , എന്നിലെ അമ്മ അതിന് സമ്മതിക്കില്ല !

വെള്ളം , ഉപ്പ് വെള്ളം , അത് കണ്ണുകളില്‍ നിന്ന്‍ ചുണ്ടിലെത്തി .

' അമ്മേ എന്നോട് ക്ഷമിക്കണേ !'

പൂതന കൃഷ്ണന്‍

2009-04-02T09:16:00.000-07:00

കുഞ്ഞരിപ്പല്ലുകളുടെ മൂര്‍ച്ച ആദ്യം അറിഞ്ഞത് അമ്മിഞ്ഞയാണ് . ആദ്യം ചോര പൊടിഞ്ഞു , പിന്നെ പഴുക്കാന്‍ തുടങ്ങി . കുഞ്ഞിനു സൂക്കേടെന്തേലും വന്നാലോ , ആശങ്കയായി! മുറിവുണങ്ങും വരെ പാലു കൊടുക്കണ്ട , തീരുമാനമെടുത്തു .

ഉണ്ണിയെ കാണാതെ അമ്മിഞ്ഞ കരഞ്ഞു , നനവറിഞ്ഞപ്പോള്‍് , പാതിയില്‍ പറഞ്ഞു നിര്‍ത്തി, ക്ലാസ് മുറിയില്‍ നിന്നും ഇറങ്ങി ഓടി . കൈ കാലുകള്‍ തളരുന്നത് പോലെ തോന്നി , എന്ത് ചെയ്യണം എന്നറിയാതെ ഞാന്‍ മേശപ്പുറത്ത് തല ചായ്ച്ചു കിടന്നു . കണ്ണുകളിലെ ചൂടു ശരീരം മുഴുവന്‍ പടര്‍ന്നു .

വൈകുന്നേരം ബസ്സിറങ്ങി അടുത്തുള്ള ലേഡി ഡോക്ടര്‍ ടെ അടുത്തേയ്ക്ക് നടന്നു , ബുക്ക് ചെയ്യാത്തതിനാല്‍ താമസിച്ചേ കാണാനാകൂ , നീണ്ട ക്യൂ . ഇരിക്കാന്‍ ഒറ്റ കസേര ഒഴിവില്ല . ഞാന്‍ താഴെ സിമന്റ്‌ തറയിലേയ്ക്കിരുന്നു . ഫോണെടുത്ത് ഉണ്ണീടെ അച്ഛനെ വിളിച്ചു . 'ഞാന്‍ തിരക്കിലാണ് , നീ ഒരു ഓട്ടോ വിളിച്ചു വീട്ടിലേയ്ക്ക് പോരെ . '

തീരെ വയ്യ , തറയിലോട്ട് കിടക്കണം എന്ന് തോന്നി , തൂണില്‍ തല ചായ്ച്ചു വച്ചതെ ഓര്‍മയുള്ളൂ . ഓര്‍മ്മ വന്നപ്പോള്‍ ചുറ്റിനും ഇരുട്ട് . ആദ്യം ഒന്നു പേടിച്ചു , പിന്നെ മനസ്സിലായി പവര്‍ കട്ടായിരുന്നു ! കൊതുകുകള്‍ കൈ കാലുകള്‍ പൊതിഞ്ഞു , ഒന്നാട്ടാന്‍ പോലും ആവതില്ല , അവ ചോര വേണ്ടുവോളം കുടിച്ചു .

ഒടുവില്‍ എന്‍റെ ഊഴമായി . ഡോക്ടര്‍ പറഞ്ഞു , 'പാലു കൊടുക്കാതെ വന്ന പനിയാണ് , ഒരു വഴിയേ ഉള്ളു , പാലു കൊടുക്കുക ! , എന്നിട്ടും കുറഞ്ഞില്ലേല്‍ നമുക്ക് കീറാം !'.....

' കീറുകയോ ...' 3 മണിക്കൂര്‍ കാത്തു നിന്നിട്ട് പറയുന്നതു കേട്ടില്ലേ ?, ദേഷ്യമാണോ സങ്കടമാണോ അതോ വേദനയാണോ എന്നറിയാന്‍ പറ്റാത്ത അവസ്ഥ !

വീട്ടിലെത്തിയപ്പോഴെയ്ക്കും ഉണ്ണി ഉറങ്ങിക്കഴിഞ്ഞിരുന്നു , മേല് കഴുകി ഞാനവന്‍റെ ചാരെ ചേര്‍്ന്നു കിടന്നു .

ഉണ്ണീടെ അച്ഛന്‍ എപ്പോഴോ വന്നു വിളിച്ചു , 'എടീ ഒരു ചായ ഇട്ടു തരുമോ , കെട്ടറങ്ങുന്നില്ല !' സമയം 11 മണി , ഞാന്‍ ദയനീയമായി നോക്കി , കണ്ടില്ല ! ചായ കൊടുത്ത് തിരികെ വന്നു വീണ്ടും കിടന്നു , മുറിയില്‍ മദ്യത്തിന്‍റെയും വിയപ്പിന്‍റെയും രൂക്ഷ ഗന്ധം ! കണ്ണില്‍ നിന്നും ചുടു കണ്ണീര്‍ നിറഞ്ഞൊഴുകി .

ഉണ്ണി ഒന്നു ഞരങ്ങി , ഞാന്‍ അമ്മിഞ്ഞ വായില്‍ കൊടുത്തു ,എന്‍റെ ഉണ്ണി പൂതന കൃഷ്ണനായി മാറി . പല്ലുകള്‍ മുറിവില്‍ ആഴ്ന്നിറങ്ങി , അവന്‍ ചോരയും പഴുപ്പും പാലും ചലവും എല്ലാം വലിച്ചു കുടിച്ചു , ഞാന്‍ വേദന കൊണ്ട് പിടഞ്ഞു . ആ വേദനയില്‍, ഞാന്‍ മറ്റെല്ലാ വേദനയും മറന്നു ,

'ഒരു താല്‍ക്കാലിക മോക്ഷം !'

സൂചിമുഖ പക്ഷി

2009-03-07T06:17:00.000-08:00

കലങ്ങിയ കണ്ണുകളില്‍ അവള്‍ കരിയെഴുതി, തൂങ്ങിയ കണ്പോളകള്‍് മസ്ക്കാര ഇട്ടു നിവര്‍ത്തി വച്ചു , കരിനീലിച്ച ചുണ്ടുകളില്‍ ചുവന്ന ചായം പുരട്ടി , ഒടുവില്‍ ജാടയുടെ കറുത്ത കണ്ണട മൂക്കില്‍ ഉറപ്പിച്ചു .

എങ്ങനെ മുഖംമൂടി വച്ചാലും ആളെ തിരിച്ചറിയുന്ന കൂട്ടരുണ്ട് , സുഹൃത്തുക്കള്‍ !
കണ്ണുകളില്‍ നോക്കി എന്ത് പറ്റി എന്ന് ചോദിച്ചപ്പോള്‍ ശബ്ദം പതറാതെ കല്യാണി ശ്രദ്ധിച്ചു .

" ഞാന്‍ പറഞ്ഞു , സ്നേഹം പിടിച്ചു പറിക്കാനോ അടിച്ചമര്‍്ത്താനോ സാധിക്കുന്ന ഒന്നല്ല , കൊടുത്താലെ കിട്ടൂ !, പിന്നെ ....."

"ഹും , കന്നത്തില്‍ മുത്തമിട്ടാല്‍ !,
കല്യാണി പഞ്ചതന്ത്ര കഥയിലെ സൂചിമുഖ പക്ഷിയുടെ കഥ കേട്ടിട്ടുണ്ടോ ?"

"ഇല്ല "

"ഒരിക്കല്‍ കുറെ കുരങ്ങന്മാര്‍ തണുപ്പകറ്റാന്‍ കുറെ കരിയിലകള്‍ കൂട്ടിയിട്ട്‌ അതിലൊരു മിന്നാമിന്നിയെ ഇട്ടു ഊതാന്‍ തുടങ്ങി , ഇതു കണ്ട സൂചി മുഖ പക്ഷി കുരങ്ങന്മാരോട് പറഞ്ഞു , 'അതൊരു മിന്നാമിന്നിയാണ് അതിനെ ഊതിയാല്‍ തീ വരില്ല , കുരങ്ങന്മാര്‍ക്കിതിഷ്ടപ്പെട്ടില്ല , അവര്‍ അവനെ ശ്രദ്ധിക്കാതെ വീണ്ടും ശ്രമം തുടര്‍ന്നു . സൂചിമുഖ പക്ഷി പിന്മാറിയില്ല . അവന്‍ വീണ്ടും ഉപദേശം തുടര്‍ന്നു . അത് സഹിക്കാനാവാതെ ഒരു കുരങ്ങന്‍ അവനെ ഒരു കല്ലിലെറിഞ്ഞു കൊന്നു ."

"ഇതിലെ ഗുണപാഠം ....?"

വല്യ ഇഷ്ടം

2009-02-10T01:51:00.000-08:00

'ഉണ്ണിയ്ക്ക് അച്ഛനെയാണോ അമ്മയെയാണോ ഏറ്റവും ഇഷ്ടം ?'

ഉണ്ണി മിണ്ടിയില്ല , ഇനിയിപ്പോ കക്ഷിക്ക് മനസ്സിലാവാഞ്ഞിട്ടാണോ ?

' ഉണ്ണിയ്ക്ക് അച്ചനെയാണോ അമ്മയെയാണോ വലിയ ഇഷ്ടം ?' ഞാന്‍ രണ്ട് കയ്യും മലര്‍ക്കെ തുറന്നു പിടിച്ചു കൊണ്ടു ആവര്‍ത്തിച്ചു . (ലോകത്തിന്റെ അങ്ങേ അറ്റം മുതല്‍ ഇങ്ങേ അറ്റം വരെ അതില്‍ കൊള്ളണം )

പത്രത്തില്‍ മുങ്ങിക്കിടന്നിരുന്ന അച്ഛന്‍ തലപൊക്കി ചെവി വട്ടം പിടിച്ചു ,

ഉണ്ണി അവന്റെ രണ്ട് കയ്യും വിരിച്ച് കണ്ണുകള്‍ രണ്ടും മിഴിപ്പിച്ചു പറഞ്ഞു

'ഉന്നിയ്ക്ക് വലിയ ഇഷ്ടം വലിയ മരപ്പട്ടീനെ !'

ഞങ്ങള്‍ മാതാപിതാക്കന്മാരുടെ കണ്ണ് തള്ളിപ്പോയി .

രണ്ടു ദിവസം മുന്നേ ചായ്പ്പിലൊരു മരപ്പട്ടീനേം കുഞ്ഞിനേം കണ്ടേപ്പിന്നെ ഉണ്ണിയുടെ കഥകളിലും പാട്ടുകളിലും മരപ്പട്ടി പറന്നു നടന്നു . വാലില്‍ നിറയെ രോമമുള്ള വലിയ മരപ്പട്ടിയാണ് അവന്റെ പ്രിയപ്പെട്ട മരപ്പട്ടി .

ഇതാണ് സംഭവത്തിന്റെ പിന്നാമ്പുറ കഥ , തെറ്റിദ്ധരിക്കല്ലേ നാട്ടാരെ !

ഉണ്ണീടെ അമ്മ

2009-01-31T09:49:00.000-08:00

ദേഷ്യം വന്നാല്‍ അച്ഛന് കണ്ണ് കാണില്ല ,

കഴിഞ്ഞ ദിവസം ഉണ്ണീടെ അച്ചന്‍ ഉണ്ണീടെ അമ്മയുടെ അടുത്ത് ദേഷ്യപ്പെട്ടു . ഉച്ചത്തില്‍ വഴക്ക് പറയാന്‍ തുടങ്ങി , അമ്മയ്ക്കാണേല്‍ ഉറക്കനെ ഉള്ള ശബ്ദം ഭയമാണ് . അമ്മയിങ്ങനെ വിറങ്ങലിച്ചു നില്‍ക്കുമ്പോള്‍ എവിടെന്നോ ഉണ്ണി ഓടി വന്നു ,

അച്ഛനും അമ്മയ്ക്കും ഇടയ്ക്ക് കയറി അവന്‍ അച്ഛന്‍റെ കണ്ണുകളില്‍ നോക്കി പറഞ്ഞു ,
'ഉന്നീടെ അമ്മയാ !'

ആ ശബ്ദത്തിനു ആജ്ഞയുടെ സ്വരമുണ്ടായിരുന്നു , അവകാശത്തിന്ടെ ശക്തി ഉണ്ടായിരുന്നു .

രണ്ടു നിമിഷം അവനെ തുറിച്ചു നോക്കിയതിനു ശേഷം അച്ഛന്‍ സ്ഥലം കാലിയാക്കി ,

എന്‍റെ രണ്ട് വയസ്സുകാരന്‍ ഉണ്ണി വലിയൊരു വൃക്ഷമായി മാറിയതും അതിന്‍റെ തണലില്‍ ഞാന്‍ ചേര്‍ന്ന് നിന്നതും പോലെയുള്ള ഒരനുഭൂതി ,

എന്‍റെ ഉണ്ണി , കൃഷ്ണാ , ഗുരുവായൂരപ്പാ !

രണ്ട് മൂക്കുത്തിക്കഥകള്‍്

2009-01-01T17:37:00.000-08:00

"എന്തഴകാ ഈ മൂക്കുത്തിയ്ക്ക് , ഇതു ഒത്തിരി നാളയോ കുത്തിയിട്ട് ? ഒത്തിരി വേദനിച്ചോ ? "

"അതൊരു കഥയാണ് ലക്ഷ്മി , കേള്‍ക്കണോ ?"

"കഥകള്‍ കേള്‍ക്കാന്‍ ഇഷ്ടമില്ലാത്തവരുണ്ടോ ടീച്ചര്‍? , പറയൂ ",

"ഇതു കുത്തിയിട്ട് 2 വര്‍ഷമായി , കല്യാണത്തിനു രണ്ടാഴ്ച്ച മുന്‍പ് , ഏകദേശം നാലു കൊല്ലം മനസ്സില്‍ കൊണ്ടു നടന്ന മോഹമായിരുന്നു ഒരു മൂക്കുത്തി വേണം ന്ന് , കല്യാണം നിശ്ചയം കഴിഞ്ഞപ്പോ അതൊരു വേദനയായി , ഇനിയിപ്പോ കല്യാണ ശേഷം പറ്റിയില്ലെങ്കിലോ ? ഭര്‍ത്താവിന്റെ അനുവാദം , വീടുകാരുടെ അനുമതി , എല്ലാരേം ബോധിപ്പിച്ചൊരു മൂക്ക് കുത്തല്‍ നടക്കും ന്ന് തോന്നിയില്ല ,

അങ്ങനെ ഒരു ദിവസം beautiparlour ല്‍ പോയി , ഒരു തോക്ക് പോലൊരു സംഭവം , 'ta ash !!!' ഒരു സെക്കന്‍റ് കൊണ്ട് മൂക്കുത്തി റെഡി , ഒരു ചെറിയ നീറ്റല്‍ , മൂക്ക് തക്കാളി പോലെ ചുമന്നു , വീട്ടില്‍ കയറി ചെന്നപ്പോള്‍ അമ്മ മൂക്കത്ത് വിരല്‍ വച്ചു , അനിയത്തി കളിയാക്കി , എന്തിനും ഏതിനും കൂട്ട് നില്ക്കുന്ന അച്ഛന്‍ പറഞ്ഞു കൊള്ളാം എന്ന് , അന്ന് തന്നെ കൂട്ടുകാര്‍ക്കൊക്കെ വിളിച്ച് പറഞ്ഞു , കേട്ടവരൊക്കെ കളിയാക്കി , ഒടുക്കം കല്യാണച്ചെറുക്കനെ വിളിച്ചറിയിച്ചു .

ആള്‍ പറഞ്ഞു 'ഇന്നത്തെ കാലത്താരേലും മൂക്കുത്തി ഇടുമോ ?ഔട്ട് ഓഫ് ഫാഷന്‍ , ഛെ എനിക്കിഷ്ടല്ല , വേണ്ട '

'ശരി , ഊരിക്കളയാം , പക്ഷെ ആ താടി വടിക്കണം അതും ഒരു ഔട്ട് ഓഫ് ഫാഷന്‍ അല്ലെ ?'

'എന്ത് ?, ഇതു വന്നെ പിന്നെ ഞാന്‍ വടിച്ചിട്ടില്ല , പറ്റില്ല '

' എങ്കില്‍ താടി അവിടിരുന്നോട്ടെ , മൂക്കുത്തി ഇവിടെ ഇരുന്നോട്ടെ '.

ഒടുക്കം രണ്ടാളും തീര്‍പ്പിലെത്തി. അവരവര്‍ക്ക് പ്രിയമുള്ളത് അവിടിരുന്നോട്ടെ !

എങ്ങിനെയുണ്ട് കഥ ?"

ലക്ഷ്മി യ്ക്കത് ക്ഷ പിടിച്ചു , അവളും മൂക്ക് കുത്തുമെന്നു പ്രഖ്യാപിച്ചു .

ലക്ഷ്മി നല്ല മാര്‍ക്കോടെ പാസ്സായി , കോളേജ് വിട്ടു , ഇന്‍ഫി യില്‍ ജോലിയുമായി . മാസങ്ങള്‍ക്ക് ശേഷം എന്നെ കാണാന്‍ വന്നു , കയ്യില്‍ wedding invitation card , മൂക്കില്‍ മൂക്കുത്തി . ഞാന്‍ സന്തോഷത്തോടെ card വാങ്ങി ചെറുക്കനെ പറ്റി അന്വേഷിച്ചു , പിന്നെ മൂക്കുത്തിയെ പറ്റി ചോദിച്ചു ,

'ഇതു ഒരാഴ്ച മുന്പ് കുത്തിയതാ , സ്വര്‍ണമെടുക്കാന്‍ പോയപ്പോ അച്ഛനെകൊണ്ട് വാങ്ങിപ്പിച്ചതാ , എങ്ങനുണ്ട് ?'

'നന്നായിട്ടുണ്ട്' '
(ആ വട്ട മുഖത്തിനു വെള്ള ക്കല്ല് നന്നായി ചേരുന്നു , എന്റെ മൂക്കുത്തി യൂണിയനില്‍ ഒരാള്‍ കൂടി !.)

"എന്നെ പെണ്ണ് കാണാന്‍ വന്നപ്പോ ഇല്ലായിരുന്നു , ടീച്ചര്‍ പറഞ്ഞില്ലേ കല്യാണം കഴിഞ്ഞാ ചിലപ്പോ പറ്റില്ലെന്ന് , അത് കൊണ്ട് ഞാനും കുത്തി , വിളിച്ചറിച്ചപ്പൊ പറയാണെ വേണ്ടാന്ന്‍ , ഞാനും വിട്ടു കൊടുത്തില്ല , ഞാന്‍ പറഞ്ഞു മീശയെടുക്ക് , മൂക്കുത്തി എടുക്കാം ന്ന്, സമ്മതിക്കാതിരിക്കാന്‍ പറ്റില്ലാലൊ !!' അങ്ങിനെ ഞാനും മൂക്കുത്തി യിട്ടു ? '"

അത് കേട്ട് , ഞാനൊന്ന് ഞെട്ടി ,
കുട്ടികളെ വഴി കാട്ടി കൊടുക്കേണ്ട ഞാന്‍ വഴി തെറ്റിച്ചുവൊ ?

കുഞ്ഞുങ്ങള്‍

2008-12-28T17:40:00.000-08:00

ഡോ.സരോജ , പ്രശസ്തയായ ഗൈനകോളജിസ്റ്റ് !
അമ്മയുടെ സുഹൃത്ത് , എന്‍റെ മോനേ രക്ഷിച്ചത് അവരാണ് .
ഡോക്ടര്‍ ഇല്ലായിരുന്നെങ്കില്‍ ഞാനും മോനും ഇന്നില്ലായിരുന്നെനെ !

എന്ത് സുന്ദരിയാണിവര്. വിരല്‍ തുമ്പുകള്‍ റോസാ ദളങ്ങള്‍ പോലെ , ഞാന്‍ കൊടുക്കുന്നത് 100 രൂപ , അങ്ങനെ എത്ര പേര്‍ ഒരു ദിവസം ? ഒരു മാസം ? ആസ്പത്രിയില്‍ നിന്നും വേറെ ! എത്ര വരും annul income ! അവര്‍ക്ക് മുന്നിലിരിക്കെ ഞാന്‍ ഡോക്ടര്‍മാരുടെ വരവ് ചിലവുകള്‍ കണക്കു കൂട്ടി .

ഡോക്ടര്‍ മരുന്ന് കുറിക്കുന്നു . അടുത്തിരുന്നിരുന്ന എന്റെ അമ്മ ചോദിച്ചു ,

'മോള്‍ടെ കല്യാണം എവിടെ വരെ ആയി ഡോക്ടര്‍ ?'

ഡോക്ടര്‍ മന്ദഹസിച്ചു .
'ഇന്നലെ സ്വര്‍ണം എടുക്കാന്‍ പോയിരുന്നു , ചെറുക്കന്റെ അച്ഛനും അമ്മയും പെങ്ങളും ഉണ്ടായിരുന്നു , അവള്‍ സന്തോഷവതിയായിരുന്നു ',പക്ഷേ ... '

ഒരു ദീര്‍്ഘ നിശ്വാസത്തിനു ശേഷം ഡോക്ടര്‍ തുടര്‍ന്നു,

'പണ്ട്‌ മോള്‍ക്ക് രണ്ടു മൂന്നു വയസ്സ് പ്രായമുള്ളപ്പോള്‍ ഞാന്‍ ഹോസ്പിറ്റലില്‍ പോകുമ്പോള്‍ അവള്‍ ചോദിക്കുമായിരുന്നു , "അമ്മ പോവാണോ ", ആ കണ്ണുകള്‍ എനിക്കിപ്പോഴും ഓര്‍മയുണ്ട് , ഞാന്‍ പോകുന്നതിനോ വരുന്നതിനോ സമയ നിഷ്ഠ വല്ലതുമുണ്ടോ ?, അവള്‍ പരാതിപ്പെട്ടില്ല , പരിഭവിച്ചില്ല , എന്നെ മനസ്സിലാക്കാന്‍ അവള്‍ നന്നേ ചെറുപ്പത്തിലെ ശ്രദ്ധിച്ചിരുന്നു ,
പക്ഷെ ഇന്നലെ ജ്വല്ലറിയില്‍ നില്‍ക്കുമ്പോള്‍ എനിക്ക് മൊബൈലില്‍ കാള്‍ വന്നു , ഒരു എമര്‍ജന്‍സി കേസ് , ഇരട്ട കുട്ടികള്‍ , pain ഉണ്ടത്രേ , പോവാതിരിക്കാന്‍ വയ്യ , ഞാന്‍ മോളോട് പറഞ്ഞു ,

"എല്ലാരും ഉണ്ടല്ലോ അമ്മ പോട്ടെ ?" അവള്‍ ചോദിച്ചു
"അമ്മ പോവാണോ ?"

ആ കണ്ണുകള്‍ , അതിനിപ്പോഴും 3 വയസ്സ് തന്നെ , സാവിത്രീ , എനിക്ക് സഹിക്കാന്‍ കഴിഞ്ഞില്ല , ഈ കൈകള്‍ എത്ര കുഞ്ഞുങ്ങളെ എടുത്തിരിക്കുന്നു , എന്റെ കുഞ്ഞിനെ മതിയാവോളം എടുക്കാന്‍ എനിക്കായിട്ടില്ല '

ഡോക്ടറുടെ കണ്ണുകള്‍ നിറഞ്ഞു , അവിടിരുന്ന എന്‍റെയും അമ്മയുടെയും , എന്ത് പറഞ്ഞാലും അതിന് ആശ്വാസ വാക്കാവില്ല .

അവിടെ നിന്നിറങ്ങിയിട്ടും ആ കണ്ണിണകള്‍ മുന്നില്‍ കാണുന്നത് പോലെ .....

അപ്പൂപ്പന്‍ താടി

2008-12-16T16:45:00.000-08:00

ഇന്നലെ സന്ധ്യയ്ക്ക്‌ വീട്ടിലേയ്ക്ക് തിരികെ വരുന്ന വഴിയില്‍ ഒരു പുല്ലില്‍ കോര്‍ന്നു കിടന്ന അപ്പുപ്പന്‍് താടി , കണ്ട മാത്രയില്‍ അതെന്നെയും ഞാനതിനെയും നോക്കി ചിരിച്ചു , ഞാനതിനെ കയ്യിലെടുത്തു . ഉണ്ണിക്ക് കൊടുക്കാം , മനസ്സില്‍ കരുതി . കയ്യില്‍ കണ്ടാല്‍ നാട്ടാരെന്തു കരുതും ? അവന് വാങ്ങിയ കപ്പലണ്ടി മുട്ടായിയുടെ കൂടെ ഞാനതിനെ ഇട്ടു .

എന്നത്തെയും പോലെ ഉണ്ണി ഗേറ്റില്‍ കാവലുണ്ട് , ഞാന്‍ ഓടി ചെന്നു പറഞ്ഞു ,

'ഉണ്ണീ ഇന്നമ്മ ഉണ്ണിക്കെന്താ കൊണ്ടുവന്നിരിക്കണെന്നറിയൊ ?എനിക്കപ്പോ അവനൊപ്പം പ്രായം ', രണ്ട് വയസ്സ് !'

ഞാന്‍ പ്ലാസ്റ്റിക് കവറില്‍ നിന്നും അപ്പൂപ്പന്‍ താടിയെ സൂക്ഷിച്ചെടുത്തു . പക്ഷെ അത് അപ്പോഴേയ്ക്കും താറു മാറായി പോയിരുന്നു .

ഞാനതിനെ പറത്താന്‍ ശ്രമിച്ചു , അത് ജീവനില്ലാത്ത പ്രേതം കണക്കെ താഴോട്ട് വീണു .

ഞാതിനെ കൊന്നുവോ ? അതോ ആയുസ്സോടുങ്ങി അത് മരിച്ചതോ ?

ഉണ്ണി കപ്പലണ്ടി മുട്ടായി കണ്ടു പിടിച്ചു , അവനതെടുത്ത് അകത്തേക്കോടി .

'വേണ്ടിയിരുന്നില്ല , ഇതാ പുല്ലില്‍ തന്നെ നിന്നാല്‍ മതിയായിരുന്നു . പാവം അപ്പൂപ്പന്‍ താടി !'.

'ന സ്ത്രീ ...... : '

2008-11-25T15:44:00.000-08:00

ടീച്ചറെ , ഓച്ചിറ വിളക്കിന് പോണില്ലേ ?

കുശലം ചോദിച്ചതായിരുന്നു , പക്ഷെ അത് നെന്ചില്‍് കൊണ്ടു , ഉള്ളിന്‍റെ ഉള്ളില്‍ വര്‍ഷങ്ങളായി നീറുന്ന ഒരു മോഹമാണ് ഒരു ഉല്സവത്തിന് പോകണമെന്ന് .

25 വര്‍ഷം പൂരത്തിന്റെ സ്വന്തം നാട്ടില്‍ ജീവിച്ചിട്ട് ഒരു കൊച്ചു പൂരം പോലും കാണാന്‍ അച്ഛന്‍ കൊണ്ട് പോയിട്ടില്ല .

ഇപ്പോളിതാ ഭര്‍ത്താവും അങ്ങിനെത്തനെ , ചുരുക്കി പറഞ്ഞാല്‍ ഇന്നേ വരെ ഒരു പൂരമോ പെരുന്നാളൊ കാണാന്‍ യോഗമുണ്ടായിട്ടില്ല .

സുരക്ഷയെ കരുതിയായിരിക്കുമെന്നു സ്വയം സമധാനിപ്പിച്ചു .

ഇനി ഒരേ ഒരു പ്രതീക്ഷയെ ഉള്ളു , മോന്‍ വലുതാകുമ്പോള്‍ അമ്മയെ കൊണ്ടു പോകുമായിരിക്കും , അതോ ഇനി അവള്‍ പറയുമോ ' എന്തിനാ എപ്പഴും നിങ്ങള്‍ അമ്മയെക്കൂടി ...'

'ന സ്ത്രീ ...... : '

അമ്മമാരേ ഇതിലെ ...

2008-11-19T08:06:00.000-08:00

"വൃശ്ചികത്തില്‍ വേവുന്ന ഗര്‍ഭ പാത്രങ്ങള്‍ " കഴിഞ്ഞ ദിവസത്തെ ദേശാഭിമാനി സ്ത്രീ യില്‍ വന്ന ഒരു ലേഖനം ആയിരുന്നു. എത്ര പേര്‍ ഇതു കണ്ടെന്നറിയില്ല , ആ തലക്കെട്ട് എന്നെ എന്തോ ആകര്‍്ഷിച്ചു.

'"ഈ വൃശ്ച്ചികത്തില്‍് വേവുന്നത്‌ ഗര്‍ഭ പാത്രങ്ങളാണ് . ഹോര്‍മോണ്‍ ഗുളികളുടെ അനിയന്ത്രിതമായ ഉപയോഗം കൊണ്ട് പീഡിപ്പിക്കപ്പെടുന്ന സ്ത്രീത്വം . മണ്ഡല കാലത്ത് മലയ്ക്ക് പോകുന്ന അച്ചന്, ആങ്ങളയ്ക്ക് , മകന് ഒക്കെ വേണ്ടി സ്വന്തം മാസമുറയുടെ മുറ തെറ്റിക്കാന്‍ തയ്യാറാവുന്ന സ്ത്രീകള്‍ . ഒരു കണക്കുമില്ലാതെ ആര്‍ത്തവം മാറി നില്‍ക്കാന്‍ ഗുളികകള്‍ മാസങ്ങളോളം വാങ്ങി കഴിക്കുന്നവരുടെ എണ്ണം കൂടി വരുന്നു ."

പിന്നീടുണ്ടാകുന്ന പാര്‍ശ്വ ഫലങ്ങള്ക്ക് ചികില്‍സ്സിക്കേണ്ടി വന്ന ഡോക്ടര്‍. ഡി ഷീല തന്‍റെ അനുഭവത്തില്‍ നിന്നും എഴുതിയിരിക്കുന്നു .

"ബോധവല്‍ക്കരിക്കാനുള്ള ശ്രമത്തിനു മുമ്പില്‍ കനത്ത പ്രതിരോധമാണ്‍് , അടുക്കളയില്‍ ഞാന്‍ മാത്രമെ ഉള്ളു , അവര്‍ക്ക് വച്ചു വിളമ്പി കൊടുക്കണ്ടേ ?"

കല്യാണത്തിനും പരീക്ഷകള്‍ക്കും വേണ്ടി ഹോര്‍മോണ്‍ ഗുളികകള്‍ കഴിച്ച കൂട്ടുകാര്‍ എനിക്കുമുണ്ട് .
ഏറെ പ്രശ്നങ്ങള്‍ ഇതു മൂലം സംഭവിക്കാം . ഈ ലേഖനത്തില്‍ ചെങ്ങന്നൂര്‍ ക്ഷേത്രത്തിലെ ത്രിപ്പൂത്താറാട്ടിനെ പറ്റിയും പറയുന്നുണ്ട് , ഈ അടുത്താണ് ഞാനും ഇതിനെ പറ്റി കേട്ടത് .

ലേഖനം ഇങ്ങനെ അവസാനിക്കുന്നു
"ദേവിക്കുള്ള ആര്‍ത്തവം പോലെ ത്തന്നെ ശ്രേഷ്ഠ്മാണ് ഓരോ സ്ത്രീയ്ക്കും ആര്‍ത്തവ കാലം . ഗാര്‍ഹിക ആവശ്യത്തിനു വേണ്ടിയായും ഭക്ത്തിയുടെയോ വിശ്വാസത്തിന്റെയോ പേരിലായാലും സ്വന്തം ഗര്‍്ഭാശയത്തെ പീടിപ്പിക്കാനുള്ള ഒരവകാശവും സ്ത്രീക്കില്ല . ഒരു വ്രതത്തിനും വേണ്ടി വേവിക്കാനുള്ളതല്ല സ്ത്രീയുടെ ഗര്‍ഭ പാത്രം "

അമ്മമാരെ സാധിക്കുമെങ്കില്‍ ഈ ലേഖനം വായിക്കണം .

പറയാനുള്ളത്

2008-11-10T09:51:00.000-08:00

"ഏട്ടാ , പാലിന്റെ പൈസ ....."

"രാവിലെ പൈസ കാര്യം സംസാരിക്കരുതെന്ന് പറഞ്ഞിട്ടില്ലേ ......@#$%, ഇന്നത്തെ എന്റെ ദിവസം കളഞ്ഞു "

"ഏട്ടാ , അതേ ......."

"*&^%$ ,ന്വൂസിന്റെ സമയത്താ അവളുടെ *&%^&*"

"ഏട്ടാ ,......"

"ഞാന്‍ കഴിക്കുന്നത് കണ്ടില്ലേ ? തിന്നാനും സമ്മതിക്കില്ല "

"ഏ......."

"ചുമ്മാ ചോറിയാനാണെല്‍് വേണ്ടാ "

"എ ...."[അല്ലെ വേണ്ട ....]

"..........."

അങ്ങിനെ പറയാതിരുന്നതും കേള്‍ക്കാതിരുന്നതും കേട്ടിട്ടും കാണാതിരുന്നതുമായ എത്രയോ കാര്യങ്ങള്‍ ! കിലുക്കാം പെട്ടിയെന്നു ചെല്ലപ്പേരുള്ള കല്യാണിയുടെ ശബ്ദം ഞാന്‍ ക്ലാസ് മുറിയില്‍ മാത്രം കേട്ടു. ഇതിനെന്താ ഒരു പോം വഴി ? ഞാനൊരു ഐഡിയ ഇട്ടു . കല്യാണിക്ക് പറയാനുള്ളത് ഒരു പുസ്തകത്തില്‍ എഴുതി വയ്ക്കുക . ശ്രീമാന്‍ സമയമുള്ളപ്പോള്‍ വായിക്കട്ടെ !

പഴയ പുസ്തകത്താളുകള്‍ തുന്നി ക്കെട്ടി കല്ലു തുടങ്ങി ......

10-11-08
.................

ഇന്നു സന്ധ്യയ്ക്ക്‌ ഞാന്‍ പച്ചക്കറി ക്കടയില്‍ നില്‍ക്കുമ്പോള്‍ നമ്മുടെ സുജ അപ്പച്ചി അതിലെ വന്നു . എല്ലാരേം അന്വേഷിച്ചെന്നു പറയാന്‍ പറഞ്ഞു.

പച്ചക്കറിക്കെന്തൊരു വിലയാണ് ? പൊള്ളുന്ന വില , 50 രൂപ കിറ്റ് രണ്ടാള്‍ക്കുള്ള സാമ്പാറിന് തികയില്ല .

ഇന്നു ഉച്ചയ്ക്ക് ചൊറുണ്ടോണ്ടിരിക്കുമ്പോ ദീപ ടീച്ചര്‍ പറഞ്ഞു . 'അധികം വൈകാതെ അമ്മ വാഴയില തോരന്‍ വച്ചു തരും , പറമ്പിലെ പയറിനും ചെമ്പിനും ഇനി ഇലയൊന്നും ശേഷിപ്പില്ല .' :)

അനൂപ് മാഷിന്റെ അവിയല്‍ വാരിക്കൊണ്ട് ആനി മാഷിനെ വാരി ' ഈ തീ പിടിച്ച സമയത്ത് അവിയല്‍ വച്ച മാഷിനെയും കുടുംബത്തെയും സമ്മതിക്കണം .'

സീത ടീച്ചര്‍ ഒരു കൂട് ലൂബിക്ക കൊണ്ടു തന്നു , ഞാനത് ഉപ്പിലിട്ടു , ഹായ് ഓര്‍ക്കുമ്പോ വായില് വെള്ളം വരണു. ഏട്ടന് ഇഷ്ട്ടല്യാ ന്നറിയാം , എനിക്കിഷ്ടാ ട്ടോ .

രാത്രി മരുന്ന് കഴിക്കാന്‍ മറക്കണ്ടാ ...

രാവിലെ നേരത്തെ എണീക്കണം

11 - 11 - 08
.....................

'ഏട്ടാ ...... എണീക്കൂ നേരം വൈകീ .... ഇന്നും എനിക്ക് ബസ് മിസ്സും .'

ജീവിക്കാന്‍ കാരണം

2008-11-05T17:09:00.000-08:00

"എന്ത് പറ്റി ? കല്യാണിയുടെ മുഖത്തൊരു മ്ലാനത ?" [അദ്ദേഹം എന്റെ സുഹൃത്തും സഹ പ്രവര്‍്ത്തകനുമാണ്]

"അത് , മാഷേ ഇനി ജീവിക്കാന്‍ ഒരു കാരണവും ഇല്ലാത്തത് പോലെ ! "

"എന്തെ അങ്ങിനെ തോന്നാന്‍, നിരാശ ?"

"നിരാശ എന്ന് പറയാമോ എന്നെനിക്കറിയില്ല ? ഒരു വലിയ ആഗ്രഹമായിരുന്നു അനിയത്തിയുടെ വിവാഹം കഴിഞ്ഞു കാണാന്‍ , എല്ലാം ഭംഗിയായി നടന്നു , അവളെ അയാള്‍ കണ്ണിലെ കൃഷ്ണമണി പോലെ നോക്കും . അതിലെനിക്ക് സന്തോഷം ഉണ്ട് , പക്ഷെ ഒത്തിരി കാലം മനസ്സില്‍ കൊണ്ടു നടന്ന മോഹം സമാപ്തിയിലെതിയപ്പോള്‍് ഇനി ജീവിക്കാന്‍ കാരണം ഒന്നും ഇല്ലാത്തത് പോലെ . ഇനി എന്തിനാ ? സ്വപ്നങ്ങളില്ലാതെ എന്ത് മനുഷ്യ ജീവിതം ? എന്തേ എനിക്ക് പറ്റിയത് ? "

"ഓ , ഇതിത്ര പരിഭ്രമിക്കാനില്ല . it happens when your wish become an obsession ! ഒരിക്കല്‍ 23 സപ്ലി അടിച്ചവന്‍ അവന്റെ 23ആമത് പേപ്പറും കിട്ടിയതിനു ശേഷം എന്നെ വിളിച്ചു, അവന്‍ ഫോണിലൂടെ കരയുകയായിരുന്നു , മാഷേ ഇനി ഞാന്‍ എന്തിനാ ജീവിക്കണേ എന്ന് ചോദിച്ചു . ഒന്നോര്‍ത്തു നോക്ക് അവന്റെ സങ്കടം ."

"വേറാരേക്കാളം എനിക്ക് മനസ്സിലാക്കാന്‍ പറ്റും അയാളെ! അപ്പൊ സാരല്ല്യാ ലെ , കുറച്ചു കഴിയുമ്പോ മാറിക്കോളും എന്ന് പ്രതീക്ഷിക്കാം !" .

കന്യാസ്ത്രീ മഠം

2008-08-14T09:18:00.000-07:00

"കേട്ടൊ മാളോരെ, ഒരു കന്യാസ്ത്രീ ആത്മഹത്യ ചെയ്തെന്ന് ", കുഞ്ഞുറുമ്പ്‌ കല്യാണിയെ പത്രം കാണിച്ചു.

കല്യാണി എന്തും ഏതും വായിക്കും, പക്ഷെ പത്രം, ഇല്ലേ ഇല്ല. പീഡനം, മരണം, ആത്മഹത്യ,കൊലപാതകം, പിഞ്ചു കുഞ്ഞു വെള്ളത്തില്‍ വീണു മരിച്ചു....എന്തിനാ വേറുതെ ? ഇതൊന്നുമില്ലാത്ത ഒരു സാങ്കല്പ്പിക ലോകം സൃഷ്ടിച്ച്‌ അതില്‍ ഒതുങ്ങികൂടാനാണ് കല്ലൂനിഷ്ടം.

കുഞ്ഞുറുമ്പ്‌ നിര്‍്ബന്ധിച്ചു . അവള് വാര്‍ത്ത വായിച്ച് നെടുവീര്‍പ്പിട്ടു !

കല്ലുന്റെ ജീവിതത്തിലെ നല്ല ഭാഗവും കന്യാസ്ത്രീ മഠത്തിലായിരുന്നു. 18 വര്ഷം! ശൈശവവും, ബാല്യവും പിന്നെ കൌമാരവും. ബാല്യകാല സ്മരണകളെന്നു വിശേഷിപ്പിക്കാന്‍ കാര്യമായി ഒന്നുമില്ല്. നാല് ചുമരുകള്‍ക്കുള്ളില്‍ എന്ത് ബാല്യം ! ഒരിടെഒട്ടും ദഹിക്കാതുമിരുന്ന പിന്നെ ദഹിപ്പിക്കാന്‍ ശ്രമിച്ചിട്ടും ഇതു വരെ ദഹിക്കാതുമിരുന്ന ചില അനുഭവങ്ങള്‍കുഞ്ഞുറുമ്പിനോടു പറയട്ടെ ?

ഒരിക്കല് കൂട്ടുകാരിയുടെ കൈപിടിച്ചു നടന്നതിന് അധ്യാപിക കൂടിയായ കന്യാസ്ത്രീ കല്ലൂനോടാക്രോശിച്ചു.

"നിനക്കിത്രേം അസുഖമാനേ ഒരു boy friend നെ തരാക്കാന്‍ അച്ചനൊട്പറയൂ."

കല്ലു ഞെട്ടി. കൈ വിട്ടു. പക്ഷെ അവർ പറഞ്ഞതിന്റെi അർത്ഥം മനസ്സിലായില്ല. അന്ന് കല്ലൂന്‌ 12 വയസ്സ്‌.

ഇതേ കന്യാസ്ത്രീ ക്ലാസ്സിൽ ശ്രദ്ധിക്കാത്തതിന്‌ ഒരു പെൺകുട്ടിയോടിങ്ങനെ പറഞ്ഞു.

"അമ്മ cable T V യിൽ എത്ര blue film കണ്ടൂന്നാണൊ നീ ചിന്തിക്കുന്നത്‌?"
[ അന്ന് വൈകീട്ട് blue film എന്താന്നറിയാൻ ചെന്ന കല്ലൂനെ അമ്മ ഓടിച്ചു വിട്ടു .'ഇതൊക്കെ എവിദെന്ന് കിട്ടണതാവോ പെണ്ണിന് ' അമ്മ പ്രാകുന്നത് കല്ലുവഴിയേ കേട്ടു. ]

പന്ത്രണ്ടാം ക്ലാസ്സില്‍ പഠിക്കുമ്പോഴാണ്‌ ഇതിന്റെയെല്ലാം പൊരുൾ കല്ലൂന്‌ മനസ്സിലാവുന്നത്‌.

"കല്യാണി ഇത്ര നല്ല കുട്ടിയാണെന്നു എനിക്ക്‌ അറിയൂലായിരുന്നു." കല്ലൂന്റെ സഹമുറിയത്തി നീണ്ട 2 വർഷത്തെ സഹവാസത്തിനു ശേഷം മനസ്സ്‌ തുറന്നു. [അതിന്‌ എന്നെ നിങ്ങൾ mind ചെയ്തിട്ട്‌ വേണ്ടെ? ] "ആരോടും ചോദിച്ചില്ലേൽ ഞാനൊരു സത്യം പറയാം. കല്യാണി ഹോമോയാണെന്നാ പെങ്കുട്ട്യോളൊക്കെ പറേണെ! "കല്ലൂന്‌ കാര്യം പിടി കിട്ടീല്യ.

അവൾ ഉറ്റ സുഹൃത്തായ മരിയയെ സങ്കടം ബൊധിപ്പിച്ചു. അപ്പോഴാണ്‌ തനിക്കജ്ഞാതമായിരുന്ന വേറൊരു ലോകത്തെക്കുറിച്ച്‌ കല്ലു മനസ്സിലാക്കുന്നത്‌.

ഹോസ്റ്റലിൽ മറ്റൊരാളുടെ മുറിയിൽ കയറുന്നത്‌,വേറൊരാളുടെ കട്ടിലിരിക്കുന്നത്‌ , കൈ പിടിക്കുന്നത്‌ ... എല്ലാംനിഷിദ്ധമായിരുന്നു.

അവർ എന്തിനാണ്‌ ഇങ്ങനെ ചിന്തിക്കുന്നത്‌? എങ്കിൽ തന്നെ എട്ടും പൊട്ടും തിരിയാത്ത ബാലികമാരോട്‌ ഇങ്ങനെ പറയാമൊ? പ്രകൃത്യാലുള്ള വികാരങ്ങളെ തടുത്തുn വയ്ക്കുമ്പോൾ സംഭവിക്കുന്ന വിഭ്രാന്തിയാണൊ ഇതിനെല്ലാം കാരണം?

കല്ലു കുഞ്ഞുറുമ്പിന്റെ നേരെ തിരിഞ്ഞു.

"കുഞ്ഞുറുമ്പെ , ഇനി ഈ വക വർത്തമാനവുമായി ന്റെ അടുത്ത് വരരുത്‌.

കല്ലു ആ പത്രം ഗോവണിയുടെ അടിയിൽ കൊണ്ട്‌ അടുക്കി വച്ചു. 'നാലു മാസായിട്ടുള്ള പത്രം ഇരുപ്പുണ്ട് .അടുത്ത ദിവസം തന്നെ മാധവേട്ടെന്റെ കടേല്‍ കൊടുത്ത് പൈസ വാങ്ങണം,' കല്ലു തീരുമാനിച്ചു.

ഒന്നാം ക്ലാസ്സിലെ എഞ്ചിനീയർ

2008-06-27T19:38:00.000-07:00

കല്യാണിയുടെ ഒന്നാം ക്ലാസ്സിലെ ആദ്യത്തെ ദിവസം, ആദ്യത്തെ പീരീഡ്‌. പുതിയ യൂണിഫോമും അലുമിനിയം പെട്ടിയും വാട്ടർ ബോട്ടിലും കുടയും എല്ലാം ബഞ്ചിനു പുറകിൽ വച്ചു. പൊക്കമുള്ള പെങ്കുട്ട്യോള്‌ പുറകിലെ ബഞ്ചിലിരിക്കണമ്ന്നാണ്‌ ചട്ടം. അസംബ്ലിക്കും അങ്ങിനെ തന്നെ. എല്ലാ കുട്ട്യോളും വലിയ വായിൽ പ്രയർ പാടുമ്പൊ പുറകിൽ നിന്ന് ജനാലകൾക്കപ്പുറത്തുള്ള മരങ്ങളും പൂക്കളും പൂമ്പാറ്റകളും നിരീക്ഷിക്കലാണ്‌ കല്ലുവിനിഷ്ടം. അങ്ങിനെ രാവിലത്തെ പ്രയറും കഴിഞ്ഞ്‌ [ഇടവപ്പാതി തകർക്കുന്നത്‌ ആസ്വദിച്ച്‌] പുതിയ ലൊകത്തിന്റെ കലപിലയിൽ കല്ലു അലിഞ്ഞിരിക്കുമ്പൊ സിസ്റ്റർ വന്നു. ഒരു ഒന്നാം ക്ലാസ്സുകാരിക്കു വായിൽ കൊള്ളാത്ത ഒരു പേരായിരുന്നു സിസ്റ്ററിന്‌. ഹാജെരെടുത്തു. ഒരോരുത്തരെയായി എഴുന്നേൽപ്പിച്ച്‌ നിർത്തി പേരും സ്ഥലവും ചോദിച്ചു. കൂടെ മറ്റൊരു ചോദ്യം "വലുതാവുമ്പൊ ആരാവണം? ". [കുഴഞ്ഞില്ലെ!] 'ആരാവണം' കല്ലു തന്നോട്‌ തന്നെ ചോദിച്ചു.

'ഡോക്ടർ, എഞ്ചിനീർ,ഡോക്ടർ, എഞ്ചിനീർ.' കുട്ട്യൊള്‌ പറയാൻ തുടങ്ങി. ഡോക്ടറിനെ കല്ലുവിനരിയാം. എപ്പൊ ഉവ്വാവു വന്നാലും അമ്മ എടുത്തോണ്ടോടുന്നത്‌ ഡോക്ടർടെ അടുത്തേക്കാണ്‌. പക്ഷെ ഈ എഞ്ചിനീർ എന്ത്ന്നാന്ന് കല്ലുവിന്‌ അറിഞ്ഞൂട. ബാക്ക്‌ ബഞ്ച്‌ എത്താറായി. കല്ലൂന്റെ നെഞ്ചിടിപ്പ്‌ കൂടി വന്നു. അപ്പൊഴാണ്‌ അടുത്തിരിക്കുന്ന സോഡാ കുപ്പി[അവളെ എല്ലാരും അങ്ങനെയാ വിളിക്ക്യ] ചോദിച്ചത്‌, 'എനിക്കൊന്നും പറയാൻ അറിഞ്ഞൂട. കല്യാണി ഒരു ഉത്തരം പറഞ്ഞ്‌ തരൊ?' കല്ലു കൂലംകഷമായി ചിന്തിചു. അച്ചനും അമ്മയും ഒാഫീസിൽ ജോലിക്ക്‌ പോകും. പക്ഷെ അവരെന്താ എന്ന് അറിയില്ല. അമ്മ പോണത്‌ കല്ലൂനിഷ്ടല്ല. കല്ലു സ്കൂളിൽ നിന്നും വന്നു കഴിഞ്ഞ്‌ പിന്നേം കുറെ നേരം കഴിഞ്ഞാ അമ്മ വരുന്നെ! അപ്പുറത്തെ സുധീടമ്മ സുധി വരുമ്പൊഴേക്കും ചായേം പലഹാരവുമായി റെധിയായി നിൽക്കും. എനിയ്ക്കും അതു പോലൊരു അമ്മയായാ മതി. കല്ലു തന്റെ ആഗ്രഹം സോഡയെ അറിയിച്ചു. 'എന്നാ ഞാനും അത്‌ തന്നെ പറയും.' സൊധ പ്രഖ്യാപിച്ചു. സോഡയുടെ ഊഴമായി. അവൾ പറഞ്ഞു, 'എനിയ്ക്ക്‌ അമ്മയായാ മതി.' ഇത്‌ കേട്ട്‌ സിസ്റ്റർ ആർത്ത്‌ ചിരിച്ചു. കൂടെ കുട്ട്യൊളും ചേർന്നു. ചിരിയുടെ ഒടുക്കം അവർ പറഞ്ഞു. എല്ലാവർക്കും വലുതായാൽ അമ്മയാവാം. വേറെ എന്താവാനാ മോൾക്കിഷ്ടം? സോഡ ഒന്നും മിണ്ടാതെ നിന്നു. പിന്നീട്‌ ഇരുന്നു. അവരെന്തിനാ ചിരിച്ചെ എന്ന് കല്ലൂന്‌ മനസ്സിലയില്ല. എല്ലാ കണ്ണുകളും കല്ലൂനെ നോക്കി. കല്ലു എണീറ്റു. ഒറ്റ ശ്വാസത്തിൽ പരഞ്ഞു. 'എനിക്ക്‌ എഞ്ചിനീർ ആവണം'.' സിസ്റ്റർ പരഞ്ഞു ' കുട്ടി ഇരിക്കൂ[ കല്ലുവിനു സമധാനായി]. എല്ലാവരും എന്നും ദൈവത്തോട്‌ പ്രാർത്തിക്കണം. ആരാവാനാഗ്രഹിക്കുന്നുവൊ അതാവാൻ ദൈവം നിങ്ങളെ സഹയിക്കും'.
ആ ദിവസത്തിനു ശേഷം കല്ലു എന്നും ദൈവത്തോട്‌ എഞ്ചിനീർ ആക്കണെ എന്ന് പ്രാർത്ഥിച്ചു. ഏതാണ്ട്‌ 3 വർഷത്തോളം അത്‌ തുടർന്നു. വർഷങ്ങൾക്ക്‌ ശേഷം കല്ലു എഞ്ചിനീറായി. [BTech പാസ്സായി ,ദൈവം കനിഞ്ഞു]. പക്ഷെ ജോലി കിട്ടാതെ കല്ലു കുറെ നാൾ വിഷമിച്ചു. അന്ന് കല്ലു ഓർത്തു, 'ദൈവം പ്രാത്ഥന കേട്ടു. പക്ഷെ.... ഇനിയിപ്പൊ പ്രാർത്ഥിച്ചതിന്റെ കുഴപ്പമാകുമൊ? 'ജോലി ഉള്ള എഞ്ചിനീർ ആക്കണെ എന്നു പ്രാർത്ഥിക്കയിരുന്നു'. തെറ്റ്‌ കല്ലൂന്റെ ഭാഗത്താ അല്ലെ?

കല്ലുവിന്റെ കല്ലുവയ്ക്കാത്ത നുണകൾ

2008-06-27T19:30:00.000-07:00

ബ്ലോഗുലകത്തെ കുറെ കാലമായി നോക്കി കാണുന്നു. എങ്ങനെ തുടങ്ങണം എന്ന ആശങ്കയായിരുന്നു. നീണ്ട ആലോചനകൾക്കൊടുവിൽ, ഈ ഇച്ചിരി സ്ഥലത്തു ഞാനിതാ കല്യാണിയുടെ കല്ലു വക്കാത്ത നുണകൾ വിതയ്ക്കുന്നു.